10,467 total views
Ikinatuwa ng pamunuan ng Dilaab Foundation sa pangunguna ni Fr. Carmelo Diola ang pagkilala ni Cebu Archbishop Alberto Uy sa kanilang gawaing pagmimisyon sa lipunan.
Sa kauna-unahang State of the Archdiocese Address (SotAA) na ginanap noong April 28 sa Cebu Metropolitan Cathedral, bukod sa mga pastoral na direksyon ng arkidiyosesis, binanggit din ni Archbishop Uy ang mga kasalukuyang programa ng lokal na simbahan na malaking hakbang sa pagpapaigting ng paghuhubog ng mananampalataya.
Sa Commission on Service, kinilala ni Archbishop Uy ang mga gawain ng Dilaab Foundation na nakatuon sa paghuhubog sa iba’t ibang sektor ng lipunan.
“In the same spirit, we gratefully acknowledge the mission of the Dilaab Foundation, under the leadership of Fr. Melo Diola. Inspired by the Word of God, they continue to form and enlighten consciences in various sectors of society, including our police and uniformed personnel,” bahagi ng pahayag ni Archbishop Uy.
Tinukoy din ng arsobispo ang mga programa ng Dilaab Foundation sa larangan ng pakikipag-ugnayan sa publiko lalo na sa mga usaping panlipunan.
“They also provide meaningful socio-political formation for students, leaders, and the wider public, helping guide them toward truth, integrity, and responsible service,” dagdag ng arsobispo.
Itinatag ni Fr. Diola ang Dilaab Foundation 25 taon ang nakalilipas na isang faith-based civil society organization na may layuning pag-alabin ang kamalayan ng mamamayan sa pananampalataya at responsableng pakikilahok sa lipunan.
Ito rin ay tugon sa pangangailangan ng mas matibay na ugnayan ng Simbahan at lipunan, lalo na sa usapin ng mabuting pamamahala, etikal na pamumuno, at matalinong pagboto.
Ilan sa mga gawain ng Dilaab ang voters’ education, leadership formation, at iba’t ibang forum na nag-uugnay sa pananampalataya at mga usaping panlipunan, kabilang na ang pagsusulong ng integridad sa pamahalaan at pakikilahok ng mamamayan sa demokratikong proseso.
