14,346 total views
Tiniyak ni Kalibo Bishop Cyril Villareal na magpapatuloy ang pamamahala at paglilingkod para sa pastoral na pangangailangan ng diyosesis sa pamamagitan ng isang opisyal na kautusan kasunod ng kanyang pag-upo bilang ikalimang obispo ng Kalibo.
Sa inilabas na decree, inatasan ng obispo ang lahat ng may hawak ng katungkulan sa simbahan na ipagpatuloy ang kanilang mga tungkulin.
“I hereby decree that all clergy, religious men and women, and lay faithful who have an official appointment… shall continue functioning according to the faculties, responsibilities, rights, and privileges that are inherent to their office,” ayon sa atas ni Bishop Villareal.
Binibigyang-diin ng kautusan na mananatiling epektibo ang naturang direktiba kaagad at magpapatuloy hanggang sa ito ay bawiin ng obispo o ng kanyang magiging kahalili.
Layunin ng hakbang na matiyak ang kaayusan, katatagan, at tuloy-tuloy na paglilingkod ng Simbahan sa mga mananampalataya ng Aklan partikular sa mahigit kalahating milyong Katoliko.
Una nang tiniyak ni Bishop Villareal sa kanyang pagsisimula ng mga gawaing pagpapastol sa diyosesis na isabuhay ang episcopal motto nito na ‘Benedicam’ o ‘I will bless’ na hango sa Salmo 34:1.
Sisikapin ng obispo na maging pastol na mananatiling malapit sa kanyang kawan, nakikinig at nakahandang gumabay tungo sa landas ni Hesus.
Hiling ni Bishop Villareal ang patuloy na panalangin para sa katatagan upang maisakatuparan ang kanyang misyon bilang pastol ng diyosesis.
