42,806 total views
Ito ang mensahe ni Bishop Ruperto Santos sa mga mananampalataya sa pagtatapos ng pagdiriwang ng Jubilee Year of Hope ng Diocese of Antipolo noong December 28, kasabay ng Kapistahan ng Banal na Mag-anak, Hesus, Maria, at Jose, sa banal na misa sa International Shrine of Our Lady of Peace and Good Voyage o Antipolo Cathedral.
Ayon sa obispo, ang Jubilee ay hindi nagwawakas sa simpleng pag-alala, kundi nagsisilbing binhi na dapat pagyamanin upang magbunga ng kabutihan at mas malalim na pananampalataya sa pamayanan ng mga Kristiyano.
“If we nurture it with prayer, water it with compassion, and guard it with courage, it will grow into a tree whose branches will shelter generations to come,” pahayag ni Bishop Santos.
Binigyang-diin ng obispo na bagama’t nagsasara na ang Taon ng Hubileyo, nagbubukas naman ang isang bagong yugto ng misyon, lalo na ang patuloy na pagsasabuhay ng habag at awa na tinanggap ng mga mananampalataya sa pamamagitan ng mga biyayang espirituwal ng Simbahan.
“As the doors of the Jubilee close, the doors of mission swing wide open. The mercy we have received must become the mercy we extend,” giit ng obispo.
Iginiit pa ni Bishop Santos na ang habag ay mas makapangyarihan kaysa kasalanan, ang pag-asa ay higit sa kawalan ng pag-asa, at ang pag-ibig ay mananaig maging sa harap ng kamatayan. Paalala rin ng obispo na ang kabanalan ay hindi lamang para sa iilan, kundi paanyaya sa lahat ng binyagang kabahagi sa misyon ni Hesus.
Hamon ng obispo sa mga mananampalataya na isabuhay ang diwa ng Jubilee sa loob ng pamilya, sa mga komunidad, at sa bansa lalo na sa gitna ng mga suliraning panlipunan tulad ng malawakang katiwalian at pagkakahati-hati ng mamamayan.
“Let us carry the Jubilee into our nation, where unity must replace division,” dagdag ni Bishop Santos.
Kinilala at pinasalamatan din ng obispo ang mga parokya, lalo na ang mga itinalagang Jubilee churches, sa mainit na pagtanggap sa mga peregrinong dumalaw at sa kanilang ambag sa pagpapalalim ng pagdiriwang ng Taon ng Hubileyo.
Sa pagtatapos, nanawagan si Bishop Santos sa mamamayan na manatiling nagkakaisa sa diwa ng pag-ibig at pag-asang hatid ni Kristo, at patuloy na maglakbay bilang iisang Simbahan at sambayanang Kristiyano.
