Hindi kumbinsido si Manila Auxiliary Bishop Broderick Pabillo, Chairman ng CBCP – Episcopal Commission on the Laity sa inilabas na ulat ng Department of Labor and Employment na 45,000 manggagawa na ang na-regular sa kanilang mga trabaho sa unang bahagi ng 2017.
Ayon sa Obispo, nararapat ding bigyang pansin ang mga dating regular na empleyado na naging kontraktwal at bantayan ang kanilang karapatan sa tamang pasahod at benepisyo.
“Kung iyan ay totoo ay magandang balita ‘yan pero dapat tingnan din natin na ang ibang regular ay nagiging contractual na lang, kaya dapat manatili silang regular. At hindi lang dapat ang pagiging regular kundi pati ‘yung mga sahod nila ay maayos at ang kanilang kalagayan ay maayos,” pahayag ni Bishop Pabillo sa Radio Veritas
Sa tala ng DOLE, pinakamarami sa mga na-regular ay mula sa Metro Manila, Central Luzon, Davao, Northern Mindanao at Caraga Regions.
Kaugnay nito, lumalabas na humigit –kumulang 20,000 mga empleyado ang naging regular buhat noong iniulat ng departamento ang 25,000 regularized workers noong November 2016.
Magugunitang noong nakaraang buwan ay nilabas ng DOLE ang Department Order 174 kung saan nakasaad ang kasiguraduhan sa security of tenure ng bawat manggagawa dahil sa pagtanggal ng contractualization.
Nauna na nang ipinahayag ng Kanyang Kabanalan Francisco na ang pagpapahalaga sa mga manggagawa kabilang na ang pagbibigay ng sapat na sahod at benepisyo ay dapat laging isaalang-alang ng mga employers.
