8,888 total reads
Ibinahagi ng Diocese of Malolos ang ordinasyon ng walong diyakono na tatanggap ng Sakramento ng Banal na Orden bilang mga bagong pari.
Pangungunahan ni Bishop Dennis Villarojo ang pagdiriwang sa June 16, alas-9 ng umaga sa Minor Basilica and Cathedral of the Immaculate Conception sa Malolos City.
Ayon sa diyosesis, ang ordinasyon ay tanda ng pagtatapos ng mahabang taon ng paghuhubog sa aspetong makatao, espirituwal, intelektuwal at pastoral ng mga kandidato sa Immaculate Conception Major Seminary.
Sa inilabas na pahayag, binigyang-diin ng diyosesis ang malalim na kahulugan ng pagtanggap ng mga diyakono sa ministeryo ng pagkapari.
“Sa pamamagitan ng pagpapatong ng kamay at Panalangin ng Ordenasyon, sila ay higit na mahuhubog ayon kay Kristo na Walang Hanggang Dakilang Pari at pagkakatiwalaan sa banal na tungkulin ng pagpapahayag ng Ebanghelyo, pagdiriwang ng mga sakramento, at paggabay sa Sambayanan ng Diyos,” ayon sa diyosesis.
Tatanggap ng ordinasyon sina Rev. Kelvin Yonell Cruz Alejandro, Rev. Wyntelmou Michiko Gabat Avila, Rev. Ariz Vargas De Castro, Rev. Mark Joseph Santos Lorenzo, Rev. Joshua Alfaro Reyes, Rev. RR Antoni Camorungan Reyes, Rev. Samuel Nicole Carpio Reyes, at Rev. Kristian Lum Talentino.
Inanyayahan ng diyosesis ang mga pari, relihiyoso at relihiyosa, seminarista, pamilya ng mga ordinando, at mga layko na makibahagi sa makasaysayang pagdiriwang at ipanalangin ang mga bagong pari habang sinisimulan nila ang kanilang ministeryo para sa Simbahan.
Ang ordinasyon ng walong bagong pari ay inaasahang magpapalakas sa misyon ng lokal na Simbahan sa Bulacan sa patuloy na pagpapalaganap ng Ebanghelyo at sa paglilingkod sa sambayanan.
