3,481 total reads
Hiniling ni Senator Francis Escudero sa mamamayan na ipanalangin ang mga guro na katuwang sa paghuhubog ng kabataan at pamayanan.
Ito ang mensahe ng mambabatas sa pagdiriwang ng World Teacher’s Day at National Teacher’s Day nitong October 5.
Batid ni Escudero ang sakripisyo ng mga guro sa paghubog sa mga kabataan sa kabila ng balakid at hamon na kinakaharap sa sektor ng edukasyon sa kasalukuyan.
“Atin pong ipagdasal ang ating mga guro sapagka’t hindi biro ang landas na patuloy nilang tinatahak sa pagtuturo at paggabay sa ating mga kabataan.” bahagi ng pahayag ni Escudero.
Ibinahagi ng mambabatas na ang pagiging guro ay hindi lamang isang propesyon kundi isang misyon lalo’t maraming hamon ang pinagtatagumpayan upang maihatid sa kabataan ang dekalidad na edukasyon.
“We salute our teachers for their selfless service to the country and for their commitment to impart knowledge to our students. Next to our parents and our families, they were among the first to influence and mold us into what we are today.” giit ng mambabatas.
Itinalaga ng Department of Education ang tema ng National Teachers’ Month at World Teacher’s Day sa ‘Together4Teachers’ bilang pagkilala sa kahalagahan ng mga guro sa lipunan.
Hiniling ng Alliance of Concerned Teachers sa mga mambabatas na dinggin ang nakabinbing 58 panukalang batas para sa pagtataas ng sahod sa mga guro sa pribado at pampublikong paaralan lalo’t naranasan sa bansa ang tuloy-tuloy na pagtaas ng presyo ng mga pangunahing bilihin habang nanatiling mababa sa living wage ang sahod ng mga guro.
Dahil dito tiniyak ni Escudero ang pakikiisa sa mga guro sa anumang hakbang na magpapaunlad sa kanilang hanay.
“Sa ating minamahal na mga guro, as your Chairman of the Senate Committee on Higher, Technical and Vocational Education, rest assured that I will be your ally in advancing the country’s educational system to produce world–class students that are at par with their overseas counterparts.” ani Escudero.
