16,014 total views
Muling inaanyayahan ng kapanalig na himpilan ang lahat na pakinggan at tunghayan ang inihandang programa bilang pakikiisa sa pagdiriwang ng Earth Hour ngayong taon.
Ito ang “Ang Banal na Oras para sa Kalikasan: Earth Hour 2025 Special,” na gaganapin ngayong Sabado, March 22, 2025 mula alas-otso hanggang alas-10 ng gabi.
Tampok sa programa ang isang oras na pagpapatay ng mga ilaw mula alas-8:30 hanggang alas-9:30 ng gabi, na sasabayan ng pagdarasal ng Santo Rosaryo at mga pagninilay mula kina Cubao Bishop-emeritus Honesto Ongtioco, Bontoc-Lagawe Bishop Valentin Dimoc, at Borongan, Eastern Samar Bishop Crispin Varquez.
Gayundin ang panayam mula sa mga makakalikasang grupo upang talakayin ang mga paksang “Caring for Our Common Home Amid Climate Crisis” at “Dirty Energy Versus Renewable Energy”.
Magsisilbi namang host ng programa sina Conference of Major Superiors in the Philippines (CMSP) co-executive secretary, Franciscan missionary, Fr. Angel Cortez; at Caritas Philippines National Integrity Ecology Program head, Ms. Jing Rey Henderson.
Mapapakinggan ang programa sa DZRV846 AM at mapapanood sa DZRV846 Facebook page, Veritas PH sa YouTube, at Veritas TV Sky Cable Channel 211.
Ito’y sa pakikipagtulungan ng World Wide Fund for Nature Philippines, Catholic Bishops’ Conference of the Philippines, Conference of Major Superiors in the Philippines, at Caritas Philippines.
Ngayong taon ang ika-17 beses na pakikibahagi ng Pilipinas sa taunang Earth Hour bilang patuloy na paninindigan upang pangalagaan ang daigdig.
Unang isinagawa ang Earth Hour noong 2007 sa Sydney, Australia, at itinuturing na pinakamalaking pagtitipon para sa kalikasan, at ngayo’y isinasagawa na sa higit 7,000 lungsod at 193 bansa sa buong mundo.
