44,948 total views
Nagpahayag ng pasasalamat ang Caritas Tarlac sa tulong na ipinagkaloob ng Caritas Manila sa mga apektado ng pagbaha at matinding pag-ulan dulot ng hanging Habagat na pinalakas ng Bagyong Crising, Dante, at Emong.
Ayon kay Fr. Randy Salunga, executive director ng Caritas Tarlac, malaking ginhawa ang naihatid ng social arm ng Archdiocese of Manila para matugunan ang pangangailangan ng mga residente sa apat na bayan ng Tarlac na labis na naapektuhan ng kalamidad.
Ibinahagi ni Fr. Salunga na ang tulungang ito ay naging simbolo ng pagkakaisa at malasakit ng Simbahan, patunay na buhay at aktibo ang pag-ibig ng Diyos sa sangkatauhan, lalo na sa oras ng pagsubok.
“Tayo bilang mga Kristiyano, ito po ang pamamaraan natin ng pagpapakita ng pagmamahal sa Diyos… Ito po ay patotoo na buhay ang Diyos, kasama natin ang Diyos, at hindi rin nagpapabaya ang Diyos, lalo na sa ganitong pagkakataon—at nararamdaman nila na ang simbahan ang unang-unang lumapit sa kanila,” pahayag ni Fr. Salunga sa programang Caritas in Action ng Radyo Veritas.
Tiniyak din ng pari na anumang sitwasyon, paniniwala, o relihiyon, nakahandang tumugon ang Simbahan sa mga higit na nangangailangan.
Hinikayat ni Fr. Salunga ang lahat na ipagpatuloy ang misyon ng pagtulong sa kapwa, lalo na sa mga mahihirap, upang maipadama ang pagkalinga ng Diyos.
“Kung paano n’yo po kami natulungan dito sa Tarlac, tulungan din po natin ang iba pa nating mga kapanalig. Sana po ay huwag kayong magsawa sa pagtulong,” saad ni Fr. Salunga.
Batay sa pinakahuling tala ng Caritas Manila, umabot na sa 30,600 katao mula sa iba’t ibang diyosesis sa National Capital Region at mga karatig-lalawigan ang nabigyan ng tulong, na may kabuuang halaga na humigit-kumulang ₱6.3 milyon.
