8,588 total reads
Naglunsad ang Archdiocese of Cebu ng isang peer-based support system para tugunan ang lumalalang usapin ng mental health ng mga pari, na nakatuon sa pakikinig, presensya, at kapatirang pastoral.
Ayon kay Archbishop Alberto Uy, magtatalaga ang arkidiyosesis ng mga “priest-companion” na magsisilbing katuwang ng kapwa pari sa pagbibigay-suporta lalo na sa oras ng emosyonal na pinagdaraanan.
Inihayag ito ni Archbishop Uy sa kanyang unang State of the Archdiocese Address sa Cebu Metropolitan Cathedral noong April 28, 2026.
“In response to the growing concern for the mental health of our clergy, we have taken a concrete step,” pahayag ni Archbishop Uy.
Sa ilalim ng programa, hahatiin sa mga pangkat ayon sa edad ang mga pari, at bawat grupo ay pipili ng dalawang kinatawan na aagapay sa mga nangangailangan ng suporta sa kanilang ministeryo at personal na buhay.
Binigyang-diin ni Archbishop Uy na layunin ng inisyatiba na mapatatag ang samahan ng mga pari sa gitna ng lumalaking hamon sa kanilang bokasyon.
“In this way, we foster not only organization, but fraternity… not only structure, but genuine care for one another,” ayon kay Archbishop Uy.
Isinagawa ang hakbang na ito kasabay ng lumalakas na pambansang atensyon sa kalusugang pangkaisipan ng mga pari, kung saan kinikilala ng mga lider ng Simbahan ang tumataas na antas ng pagkabalisa sa kaparian.
Magugunita sa homiliya ng Chrism Mass sa Manila Cathedral noong April 2, binanggit ni Manila Archbishop Jose Cardinal Advincula na nasa 18 porsyento ng mga pari sa bansa ang nakararanas ng psychological distress.
Tinatayang isa sa bawat limang pari ang dumaranas ng depression, anxiety, pag-iisa, at burnout.
“This is a concern we cannot ignore anymore, and we have to face it to resolve it,” ayon kay Cardinal Advincula.
