7,386 total views
Pinaalalahanan ni Manila Archbishop Jose Cardinal Advincula ang mga mananampalataya na ang pagkalimot at paglayo sa Diyos ang ugat ng pagkaligaw ng tao.
Sa kanyang homiliya sa pagdiriwang ng ika-18 kapistahan ng Jesus of Nazareth Parish sa Old Balara, Quezon City, binigyang-diin ng kardinal ang malubhang panganib sa pagkawala ng kamalayan sa presensya ng Diyos sa gitna ng mga hamon ng makabagong panahon.
“To lose the sense of God is to lose the sense of sin. Kapag kinalimutan natin ang Diyos, wala na ring basehan ng tama o mali, matuwid o baluktot, moral o imoral. Kapag kinalimutan natin ang Diyos, hindi na malayo ang kasamaan at kasalanan,” ayon sa pagninilay ni Cardinal Advincula.
Dagdag pa ni Cardinal Advincula na dapat alalahanin ng tao ang Diyos sa araw-araw na pamumuhay, hindi lamang sa loob ng mga simbahan kundi maging sa tahanan, paaralan, at trabaho upang makaiwas sa tukso ng kasamaan.
“Huwag nating kakalimutan ang Diyos, sapagkat sa oras na kinalimutan natin ang Diyos, madali tayong mahuhulog sa kasalanan,” ayon pa sa kardinal.
Tinukoy ng arsobispo ang tunay na diwa ng pag-ibig na ipinamalas ni Hesus na nakaugat sa pag-aalay ng sarili para sa kapwa.
Hinimok ni Cardinal Advincula ang mananampalataya na ibalik ang Diyos sa sentro ng buhay ng bawat isa sa gitna ng tumitinding ingay ng mundo tulad ng mga kaguluhan, impluwensya ng materyalismo at maging ang pagtuon sa sarili.
“Ang pag-ibig ay pagkalimot sa sarili para sa iba… Sa mundong nakakalimutan o pilit na kinakalimutan ang Diyos, sa mundong ang inaalala at mahalaga lamang ay ang sarili, ibalik natin ang alaala ng Diyos,” giit ni Cardinal Advincula.
Paalala pa ng kardinal na sa bawat paglalakbay ng tao, si Hesus Nazareno ang patuloy na umaakay sa bawat isa sa kabila ng mga pagsubok at suliranin sa buhay.
Apela ng arsobispo sa mga deboto na manatiling matatag sa pananampalataya at huwag hayaang matabunan ng ingay ng lipunan ang presensya ng Diyos, na siyang gabay sa tama at makabuluhang pamumuhay.
Katuwang ng kardinal sa banal na misa si Fr. Osben Pantorilla ng Sons of Charity, ang kasalukuyang kura paroko ng parokya na nangangasiwa sa mga programang nakatuon sa liturhiya, katesismo, at social outreach ng mission area ng Old Balara.
