6,740 total reads
Opisyal nang iginawad ng Diocese of Calapan ang solarization contracts para sa pitong parokya sa Oriental Mindoro bilang bahagi ng kauna-unahang REnew Mindoro Investments Summit na ginanap sa Divine Word College of Calapan noong April 30, 2026.
Pinangunahan ang summit ng Diocese of Calapan Social Action Center, Center for Energy, Ecology, and Development, kasama ang mahigit 150 kinatawan mula sa pamahalaan, pribadong sektor, financing institutions, at civil society organizations.
Ayon kay Fr. Edwin Gariguez, social action director ng diyosesis at lead convenor ng Protect the Verde Island Passage Network, makabuluhang tugon ito ng Simbahan, katuwang ang iba’t ibang organisasyon, sa patuloy na suliranin ng mga Mindoreño sa pagkakaroon ng maaasahan at abot-kayang suplay ng kuryente.
“Tonight, Mindoro celebrates light. But for many of our people, light remains uncertain,” pahayag ni Fr. Gariguez.
Umaabot sa 200 kilowatt-peak (kWp) ang kabuuang solar capacity ng mga proyekto na nalikom mismo ng mga parokya sa loob lamang ng limang buwan, sapat upang makalikha ng tinatayang 800 hanggang 1,000 kilowatt-hours ng malinis na kuryente kada araw.
Kabilang sa mga parokyang tumanggap ng kontrata ang Good Shepherd Parish sa Victoria; St. Joseph Parish sa Bongabong; St. Catherine of Alexandria Parish sa Mansalay; Our Mother of Perpetual Help Quasi Parish sa Biga, Calapan City; St. Augustine Parish sa Pinamalayan; Sts. Peter and Paul Chaplaincy sa Lumangbayan, Calapan City; at St. Isidore Labrador Parish sa Nabuslot, Pinamalayan.
Hinimok din ni Fr. Gariguez ang iba’t ibang sektor na huwag lamang ituon ang pansin sa kasalukuyang krisis sa enerhiya, bagkus kilalanin din ang hindi pa ganap na napapakinabangang likas na yaman at potensyal na renewable energy ng Mindoro.
“We are not energy poor; we have just yet to unlock how our natural resources can generate mura, maaasahan, at malinis na kuryente for every Mindoreño,” dagdag ni Fr. Gariguez.
Nakabatay ang proyekto sa mga naunang pilot solar installations sa Victoria, kabilang ang Mangyan-Tadyawan community solar project, bilang konkretong hakbang ng Simbahan tungo sa pangangalaga sa kalikasan at pagsusulong ng makatarungan at sustenableng kaunlaran alinsunod sa diwa ng Laudato Si’.
