6,708 total views
Itinampok ng Claretian missionaries ang documentary film na Seeds of Peace: The Life of Fr. Rhoel Gallardo sa paggunita sa kamatayan ni Claretian martyred Fr. Rhoel Gallardo.
Ayon kay Fr. Amado Tumbaga, CMF, provincial superior ng Fr. Rhoel Gallardo Province, ang pagtatanghal ng documentary film ay may layuning alalahanin ang sakripisyo ng pari at hikayatin ang mananampalataya sa sama-samang pagninilay at talakayan hinggil sa pananampalataya, kapayapaan, at pagpapatawad.
Binigyang-diin ni Fr. Tumbaga na ang pelikula ay sumasalamin hindi lamang sa buhay ni Fr. Gallardo kundi maging sa karanasan ng buong komunidad na lubhang naapektuhan ng karahasan.
“Itong Seeds of Peace kasi ay personal na karanasan, hindi lamang ni Fr. Rhoel, kundi yung mga survivors at yung buong community ng Tumahubong. At dito talaga nasubok yung kanilang pananampalataya,” pahayag ni Fr. Tumbaga sa Radyo Veritas.
Dagdag pa ng pari, sa kabila ng mga karahasang naranasan ng komunidad ay higit pang tumibay ang kanilang pananalig at ang pagiging isang komunidad sa gitna ng pagsubok.
“So mas lumalim yung pananampalataya, paglilingkod at commitment ng mga Kristiyano. Kasi yung practice natin ng faith ay hindi lamang personal. We are called to be one community, to be one church, na sinusuportahan yung isa’t-isa,” dagdag pa ni Fr. Tumbaga.
Ibinahagi rin ng superior ng Claretian missionaries na ayon sa mga testimonya ng mga kasamang nabihag ni Fr. Gallardo ay nanatiling matatag ang pari sa kabila ng mga naranasang pagpapahirap mula sa mga Abu Sayyaf at ng kanyang paninindigan para sa pananampalataya.
Tumatak sa mga survivors ang pananatiling pastol ni Fr. Gallardo sa bingit ng kamatayan kung saan ipinamamalas ang malasakit sa kapwa sa kabila ng paghihirap.
“Hindi sumuko si Father Rhoel. Kahit na na-torture siya, hindi niya isinuko yung kanyang pananampalataya. Pinoprotektahan niya, lalo na yung mga bata at saka yung mga kababaihan,” aniya.
Tinuran din ni Fr. Tumbaga na hindi lamang ito isang simpleng pelikula kundi umaasa rin ang kongregasyon, pamilya at mga mananampalataya na ito ay makatutulong sa pagsusulong ng beatipikasyon at kanonisasyon sa pagiging martir ni Fr. Gallardo.
“Hindi ito simpleng pelikula; ito ay proseso ng pagdodokumento ng katotohanan upang mapatunayan ang kanyang pagiging martir,” giit ni Fr. Tumbaga.
Isinalaysay naman ng aktor na si Zaijan Jaranilla na gumanap sa papel ni Fr. Gallardo sa pelikula na bahagi ng kanyang paghahanda ang pakikipag-ugnayan sa mga survivors.
Aminado ang aktor na nag-iwan ng malalim na personal na karanasan habang isinasabuhay ang papel ng pinaslang na pari.
“Nakipag-usap din po ako doon sa mga survivors tungkol sa kung paano siya noon during captivity. Tinanong ko kung paano siya naging matapang. Hindi ako naghanap ng masyadong maraming tanong, basta nag-dive lang ako doon sa character at niyakap ko lang mismo si Father Rhoel,” pahayag ni Jaranilla.
Samantala, nagpasalamat naman at ipinaabot ni Jessie Gallardo, ang kapatid ng pinaslang na misyonero, ang mensahe ng pag-asa at ang mensahe ng documentary film para sa bawat isa hinggil sa mga halimbawang ipinamalas ni Fr. Gallardo.
“This movie may serve as an inspiration para sa bawat isa sa atin. Sa kabila ng matinding paghihirap o mararanasan, saan tayo huhugot ng lakas? It’s our faith… Faith, hope, and forgiveness. And that forgiveness brought us peace,” ani Gallardo.
Ibinahagi ni Fr. Tumbaga na ang Seeds of Peace: The Life of Fr. Rhoel Gallardo ay bukas lamang para sa community screening, kaya’t ang mga nagnanais na mapanood ang pelikula ay maaaring makipag-ugnayan sa mga official Facebook pages ng Claretian Missionaries – Fr. Rhoel Gallardo Province at ng Claret Media.
“Ang Seeds of Peace will not be released commercially. Ang vision namin sa Seeds of Peace ay community screening sa mga parishes, schools, institutions, kasi ang vision namin ay hindi lang basta manood. So meron tayong talkback or discussion, where we share our reflections after the movie,” giit ni Fr. Tumbaga.
Hinikayat ng mga Claretians at mga tagapagtaguyod ng pelikula ang mga mananampalataya na makibahagi sa mga community screenings na layong gawing pagkakataon sa sama-samang pagninilay at pagbabahagi ng mga karanasan na isang konkretong pagpapatuloy ng binhing iniwan ng buhay at kamatayan ni Fr. Gallardo bilang saksi ng pananampalataya at kapayapaan.
Si Fr. Gallardo ay dinukot ng mga bandido sa Claret School sa Tumahubong, Basilan noong March 2000 at tuluyang pinaslang noong May 3 ng parehong taon.
Noong May 3, 2021 nang binuksan ang diocesan process ng kanyang beatipikasyon bilang pagkilala sa pagiging martir ng Claretianong misyonero.
