7,936 total reads
Nagpapatuloy ang Camino de Padre Ezekiel kung saan binisita ang San Ezekiel Moreno Parish sa Diocese of Kalookan at dinala ang pinakamalaking first-class bone relic ni San Ezekiel Moreno, patron ng mga may kanser.
Ayon sa St. Ezekiel Moreno Novitiate-Recoletos, ito ay bahagi ng misyon na palalimin ang debosyon sa santo at magbigay ng espirituwal na suporta sa mga dumaranas ng karamdaman.
Naging makahulugan ang pagdalaw ng relikya noong June 7, Corpus Christi Sunday, sapagkat ang San Ezekiel Moreno Parish sa Caloocan City ay kinikilalang kauna-unahang parokya sa buong mundo na ipinangalan sa santo.
“The pilgrimage seeks to foster greater devotion to St. Ezekiel Moreno amid the rising incidence of cancer in the country,” ayon sa pahayag ng St. Ezekiel Moreno Novitiate-Recoletos.
Bahagi rin ito ng paghahanda ng mga mananampalataya para sa pagdiriwang ng kapistahan ni San Ezekiel Moreno tuwing Agosto 19.
Pinangunahan ni Fr. Joseph Panaligan, OAR, ang pagdala ng reliquary sa Kalookan kasama ang mga kasapi ng Secular Augustinian Recollect Fraternity, at mga Recoletong seminarista.
Pormal na itinatag ang parokya noong November 1, 1992 sa pamamagitan ni noo’y Manila Archbishop Jaime Cardinal Sin bilang pagkilala sa bagong hirang na santo na nagmisyon din sa Pilipinas.
Personal na dumalo si Cardinal Sin sa canonization ni San Ezekiel Moreno sa Dominican Republic noong October 11, 1992.
Patuloy namang hinihikayat ng mga Augustinian Recollect ang mga mananampalataya na hingin ang pamamagitan ng santo para sa mga may karamdaman sa kanser, sa kanilang mga pamilya, at sa mga tagapag-alaga.
“May St. Ezekiel Moreno continue to intercede for all who suffer, bringing hope, strength, and consolation to those battling cancer and to their loved ones,” ayon sa St. Ezekiel Moreno Novitiate-Recoletos.
Nananatiling nakalagak ang relikya sa St. Ezekiel Moreno Novitiate House sa Antipolo City at patuloy na inililibot sa mga diyosesis, dambana, at parokya sa bansa bilang bahagi ng pagpapalaganap ng debosyon kay San Ezekiel Moreno.
