6,545 total reads
Binigyang-diin ni Cebu Archbishop Alberto Uy na hindi dapat ituring na paglabag ang mapayapa at responsableng pagtatanggol sa kalikasan.
Ito ang pahayag ng arsobispo bilang pakikiisa kay Bayombong Bishop Jose Elmer Mangalinao na nahaharap sa mga kasong may kaugnayan sa kanyang adbokasiya para sa kapaligiran.
Sa kanyang mensahe, tiniyak ni Archbishop Uy ang kanyang panalangin at suporta para kay Bishop Mangalinao, na matagal nang naninindigan kasama ng mga katutubo, magsasaka, environmental advocates, at mga lokal na komunidad sa pangangalaga ng mga watershed, kagubatan, at iba pang likas na yaman.
Iginiit ng arsobispo na ang paninindigan ng obispo ay hindi bunga ng interes sa pulitika kundi ng kanyang tungkuling pastoral na pangalagaan ang sambayanan at ang sangnilikha ng Diyos.
“As a Church, we believe that caring for creation is not optional. It is part of our responsibility as stewards of the gifts entrusted to us by God. Protecting the environment means protecting communities, livelihoods, and the future of generations yet to come,” pahayag ni Archbishop Uy.
Ayon pa sa arsobispo, bagama’t iginagalang ng Simbahan ang umiiral na batas at ang kasarinlan ng mga hukuman, mahalaga ring igalang ang karapatan ng mga mamamayan at mga lider ng Simbahan na magpahayag ng makatuwirang pangamba sa mga usaping may kinalaman sa kabutihang panlahat.
Binigyang-diin niya na ang pangangalaga sa kalikasan ay bahagi ng pananagutan ng tao bilang katiwala ng mga biyayang ipinagkaloob ng Diyos at mahalaga sa pangangalaga sa mga pamayanan, kabuhayan, at kinabukasan ng susunod na henerasyon.
“The peaceful and responsible defense of our common home should never be treated as a wrongdoing,” dagdag ng arsobispo.
Pinuri rin ni Archbishop Uy si Bishop Mangalinao dahil sa ipinakitang katapangan, integridad, at katapatan sa Ebanghelyo, na aniya’y sumasalamin sa panawagan ni Pope Francis na pakinggan ang hinaing ng daigdig at ng mahihirap.
Nahaharap si Bishop Mangalinao at iba pang environmental advocates sa mga kasong isinampa kaugnay ng kanilang pagtutol sa exploration activities ng North Luzon Minerals Resources Corporation sa 4,456-hektaryang lupain sa loob ng Bugkalot/Ilongot ancestral domain sa Kasibu, Nueva Vizcaya.
Patuloy namang lumalawak ang suporta ng iba’t ibang lider ng Simbahang Katolika para sa obispo habang hinihintay ang mga susunod na pagdinig sa kaso.
“In standing with Bishop Elmer, we stand for the dignity of every person, the protection of creation, and the welfare of future generations,” ayon kay Archbishop Uy.
