80,444 total reads
Binigyang-diin ni Rodne Galicha, chairperson ng Bayay Sibuyanon at executive director ng Living Laudato Si’ Philippines, ang kahalagahan ng pagkakaisa ng mamamayan at mga halal na kinatawan sa pagsusulong ng kabutihang panlahat at pangangalaga sa kalikasan.
Inihayag ito ni Galicha matapos bawiin ng Sangguniang Bayan ng San Fernando, Romblon ang naunang endorsement sa aplikasyon ng Altai Philippines Mining Corporation (APMC) para sa planong pagmimina sa Barangay España, kasunod ng patuloy na usapin hinggil sa pangangalaga sa isla ng Sibuyan.
Nagpaabot naman ng pasasalamat ang environmental advocate sa mga Sangguniang Barangay, Sangguniang Bayan, at Sangguniang Panlalawigan ng Romblon dahil sa kanilang pakikinig, pagsusuri, at pagtupad sa kanilang mandato para sa kapakanan ng mamamayan at kalikasan.
“Ngayong araw ay isang paalala na kapag nagkakaisa ang mamamayan at ang kanilang mga halal na kinatawan, may kakayahan tayong itaguyod ang kabutihang panlahat,” pahayag ni Galicha.
Ayon kay Galicha, ipinapakita ng mga naging desisyon ng mga lokal na lider sa Romblon na ang mabuting pamamahala ay nakabatay sa pananagutan, paggalang sa batas, at malasakit sa mga susunod na henerasyon.
Kasabay nito, nanawagan si Galicha sa mamamayan na manatiling mahinahon at ipagpatuloy ang mapayapang pagkilos, panalangin, diyalogo, at sama-samang pagkilos para sa pangangalaga ng kalikasan.
“Ang ating lakas ay hindi nasusukat sa galit kundi sa katatagan ng ating paninindigan. Ipagpatuloy natin ang mapayapang pagkilos, ang panalangin, ang pag-uusap, at ang sama-samang pagkilos para sa ating nag-iisang tahanan,” saad ni Galicha.
Binigyang-diin din ng environmental advocate na hindi sapat ang pagtutol lamang sa mga proyektong maaaring makaapekto sa kapaligiran, kundi mahalaga ring maisulong ang mga alternatibong paraan ng pag-unlad na nagbibigay-proteksyon sa kalikasan at lumilikha ng kabuhayan.
Kabilang dito ang ecotourism, sustainable agriculture at fisheries, forest restoration, renewable energy, at iba pang inisyatibang nagtataguyod ng pangmatagalang kaunlaran para sa mga pamayanan.
Nanawagan din si Galicha sa mga pambansang ahensya ng pamahalaan na higit pang pagtibayin ang kanilang pagtutulungan upang maisulong ang isang uri ng kaunlarang makatarungan, matatag, at kapaki-pakinabang para sa tao at kalikasan.
“Ang kalikasan ang ating pinakamahalagang puhunan—at kapag ito ay ating iningatan, ito rin ang patuloy na mag-aalaga sa atin,” ayon kay Galicha.
Nauna nang nagbigay ng endorsement ang Sangguniang Bayan ng San Fernando sa aplikasyon ng Altai Philippines Mining Corporation para sa planong pagmimina sa Barangay España bago ito bawiin sa pamamagitan ng recall resolution na inaprubahan sa botong 4-2 nitong August 3, 2026.
