503 total reads
Ganito isalarawan ni dating Catholic Bishops Conference of the Philippines President and Lingayen Dagupan Archbishop Emeritus Oscar Cruz ang pagpapatupad ng Aquino administration ng K – 12 program sa bansa.
Ayon kay Archbishop Cruz, dahil sa kakulangan sa kahandaan ng pamahalaan ay naperwisyo ang maraming mga guro at estudyante sa kawalan ng mga pasilidad sa unang taong implementasyon ng Senior High School.
Umaasa naman ang arsobispo na pupunan ng Duterte administration ang mga kakulangan ng nakaraang administrasyon at maiwasto ang mga kulang na pasilidad at mga guro.
“Sa classrooms kulang, facilities kulang, guro kulang,papaano ba naman yun? Itong (Aquino) administrasyon alam naman nilang anim na taon lang sila at hindi naman nila kaya yun. Bakit papasukin ito baka ito namang darating na (Duterte) administrasyon, ewan ko lang kung sumasampalataya sa K -12. Kung sa susunod na administrasyon ay okay sa kanila ang K – 12 baka this six years coming ay baka makagawa sila ng husto na wasto na ang silid – aralan, wasto na rin ang mga teachers,” bahagi ng pahayag ni Archbishop Cruz sa panayam ng Veritas Patrol.
Ginawa ng arsobispo ang pahayag matapos na ihayag ni incoming Department of Education Sec. Leonor Briones na nasa 31,000 na guro pa ang kinakailangan ng kagawaran.
Batay naman sa ulat ni outgoing DepEd Sec. Bro. Armin Luistro, FSC na nasa 11 libong mga bagong silid – aralan na ang kanilang naipatayo.
Sinasabing mahigit sa 400-libong estudyante na nagtapos ng junior high ang nabigong makapag-enroll sa Senior high ngayong school year dahil sa kakulangan ng mga paaralang mapapasukan at mahal na singil sa matrikula
