846 total reads
Inihayag ni Novaliches Bishop Emeritus Antonio Tobias na mas umigting ang katangian ng paglilimos at pagdarasal ng mamamayan sa panahong nahaharap sa pandemya ang lipunan.
Sa homiliya ng obispo nitong Pebrero 17 o ang Miyerkules de Ceniza inihayag nitong ang pagbabahagi sa kapwa lalo na sa mga naghihikahos ay maituturing na sagisag ng paglago ng pananampalataya at pagpalaganap ng dakilang pag-ibig ng Panginoon sa sambayanan.
“Sa panahong ito ng pandemya ang ating paglilimos ay nakatutulong at nagpapalakas sa ating pananampalataya ngayong kuwaresma; nagpapahayag ng pagmamahal ng Diyos sa kapwa,” pagninilay ni Bishop Tobias.
Ayon pa kay Bishop Tobias na sa lenten message ng Kanyang Kabanalan Francisco binigyang koneksyon nito ang theological virtues at ang mga mahahalagang gawain ng kuwaresma.
Paliwanag ng obispo na ang pananampalataya, pag-asa at pagmamahal ay nakaugnay sa pagdadasal, pag-ayuno at paglilimos.
Sinabi ng Obispo na sa pag-aayuno ay natutuhan ng tao ang pagkontrol sa sarili halimbawa sa pagkain kung saan nakapagbabahagi pa ito sa kapwa.
Giit ni Bishop Tobias na sa pagdarasal ay nabigyan ang bawat isa ng pag-asa sa katubusang hatid ni Hesus sa Kanyang muling pagkabuhay.
“Kapag naisagawa natin ang magandang hiyas ng pagiging kristiyano, ang pag-ayuno, pagdarasal at paglilimos ay lalong umuusbong ang ating pananampalataya, pag-asa at pagmamahal tungo sa ating kapwa,” ani Bishop Tobias.
Ang Miyerkules ng abo ang simula ng apatnapung araw na paghahanda sa pagpapakasakit, pagkamatay at muling pagkabuhay ni Hesus na nagdudulot ng kaligtasan sa sangkatauhan.
