Pinayuhan ni incoming Archdiocese of Ozamiz, Bishop Martin Jumoad si pangulong Rodrigo Duterte na magdahan-dahan sa mga binibitiwang salita sa mga malalaking bansa at organisasyon tulad ng Estados Unidos, United Nation at European Union.
Ayon kay Bishop Jumoad kailangan pa ring mangibabaw sa Pangulo ang respecto sa mga makapangyarihang bansa upang maiwasan ang girian sa mga karatig rehiyon at bilang pagtanaw na rin ng utang na loob na sa mga ipinagkaloob nilang tulong sa ating bansa.
“We will really be affected if that will continue and I hope the President will moderate his talking in terms of mga masamang mga salita laban sa mga big countries. Ang importante respecto,” giit pa ni Bishop Jumoad sa Radyo Veritas.
Pabor naman si Bishop Jumoad sa unti – unting pagkalas ng bansa sa pagdidikta ng Amerika upang malaya nang mapa – unlad ang ekonomiya lalo na sa kapasidad ng bansa na maibenta ang mga produkto nito sa karating rehiyon na hindi na kontrolado ng mga dayuhang bansa.
“We stand up for our own, the most important here we know really how we stand up and how to develop our own country because it if we keep depending on other country then hindi yun maganda. Ang importante we have the capability yung mga materials natin kailangan nating madevelop para maibenta natin sa ibang nasyon,” bahagi ng pahayag ni Bishop Jumoad sa panayam ng Veritas Patrol.
Magugunitang, ginisa ng Pangulo ang US, UN at EU dahil sa patuloy na pakikialam ng mga ito sa patuloy na kampanya kontra ilegal na droga kung saan umaabot na sa mahigit tatlong libo na ang namamatay.
Sa kasalukuyan ayon sa pagsusuri ng ilang ekonomista napapanatili pa rin ng Pilipinas ang pinaka – mabilis na paglago ng ekonomiya sa rehiyon matapos na bumagsak ang piso sa pinaka – mahinang antas nito sa loob ng pitong taon.
Nauna na ring sinabi ni Pope St. John Paul II na mahalagang idaan sa tahimik at mapayapang dayalogo ng isang lider ang mga usaping kinakaharap ng bansa upang maiwasan ang giringan na maaring magdulot ng kapahamakan sa kanyang nasasakupan.
