650 total reads
Nakikiramay ang Catholic Bishops Conference of the Philippines – Episcopal Commission on Migrants and Itinerant People sa mga kaanak ng isang Pinay domestic helper sa Milan, Italy na namatay sa isang aksidente.
Ayon kay Balanga, Bataan Bishop Ruperto Santos, chairman ng komisyon, pagpapakita lamang ito na ang buhay ng mga overseas Filipino workers laging nasa bingit ng panganib ngunit patuloy na nagsusumikap para lamang matulungan ang kanilang mahal sa buhay.
Maging aral nawa ayon kay Bishop Santos sa pamahalaan ang naturang insidente upang mas lalong bigyan ng pagpapahalaga ang nasa 15 milyong OFW sa iba’t ibang panig ng mundo.
“Ito ay nagpapakita sa atin na kung saan ang buhay ng ating mga OFW ay palaging nasa panganib at ang kanilang ginagawa ay tanda ng pagpapakasakit ng pagmamalasakit ng mga naiwan nila dito sa Pilipinas na gumanda ang buhay. Isang buhay ang naitaya nagpakasakit para sa buhay ng mga naiwan dito. At ito ay isang aral na dapat nating pahalagahan, alagaan at ingatan ang buhay ng ating mga OFW,”pahayag ni Bishop Santos sa panayam ng Veritas Patrol.
Nag – alay naman ito ng panalangin upang lubusan ng matanggap at manalig sa Diyos ang pamilya ng nasawing Pinay domestic helper at gayundin ang kaligtasan rin ng iba pang mga OFW.
“…ating ipagdasal na sa kanilang pagtatrabaho, sa kanilang paglalakad, sa kanilang pamumuhay sa kanilang bansa palagi silang gabayan ng Diyos, maging ligtas sa kapahamakan at karamdaman,” giit pa ni Bishop Santos sa Radyo Veritas.
Sa inisyal na imbestigasyon, nahagip ng SUV o sport utility vehicle ang biktima na si Myrna Reyes at nabagok pa ang ulo nito sa kalsada.
Naisugod pa si Reyes sa ospital, pero binawian din ng buhay makalipas ang isang oras dahil sa internal bleeding. Inaasikaso na ng OWWA ang mga papeles para maiuwi dito sa Pilipinas ang labi ng nasabing Pinay domestic helper.
Nauna na ring binanggit ni Pope Francis na kailangang pangalagaan ang mga OFW dahil sila ang nagpapa – anagt ng ekonomiya ng bansa.
