15,846 total reads
Nanawagan si Caritas Philippines President, San Carlos Bishop Gerardo Alminaza, na magsilbing pagkakataon ang pagpapalit ng liderato sa Department of Environment and Natural Resources (DENR) upang itaguyod ang katarungan at pangmatagalang proteksiyon sa Verde Island Passage (VIP).
Kasunod ito ng pagtalaga ni Pangulong Ferdinand Marcos, Jr. kay Undersecretary Juan Miguel Cuna bilang acting DENR secretary, habang hinirang naman si outgoing secretary Raphael Lotilla bilang Philippine ambassador to the Holy See.
Ayon kay Bishop Alminaza, nawa’y magsilbing pagkakataon ang bagong tungkulin ni Cuna upang itaguyod ang pangangalaga sa kalikasan, alinsunod sa panawagan ng Simbahang Katolika hinggil sa pangangalaga sa nag-iisang tahanan, lalo na sa diwa ng Laudato Si’ ni Pope Francis at Dilexit Te ni Pope Leo XIV.
“An opportunity, at the same time, to make good with his duties to the Filipino people after a history of having advanced coal and gas, and of undermining critically biodiverse ecosystems such as the Verde Island Passage,” pahayag ni Alminaza.
Sinabi ng obispo na tatlong taon matapos ang mapaminsalang oil spill sa VIP, patuloy na pinapasan ng mga mangingisda at baybaying komunidad ang epekto ng trahedya.
Binigyang-diin din ni Bishop Alminaza na hanggang ngayon ay hindi pa rin ganap ang pananagutan ng mga kumpanyang sangkot at ang kabayaran sa mga apektadong komunidad.
“Accountability of erring companies and reparation owed to affected communities remain elusive. At the same time, government bodies responsible for protecting our environment have yet to act on the rehabilitation and long-term protection of the VIP. All this silence makes our cry for justice even louder,” dagdag ng obispo.
Iginiit ng Caritas Philippines, mahalagang italaga ang VIP bilang isang protected seascape upang matiyak ang pangangalaga sa natatanging yamang-dagat at mapangalagaan ang seguridad sa pagkain at kapakanan ng mga susunod na henerasyon.
Hinimok din ng pinuno ng social at advocacy arm ng Catholic Bishops’ Conference of the Philippines si Acting Secretary Cuna na maging tapat sa mandato ng DENR at unahin ang katarungan, pananagutan, rehabilitasyon at pangmatagalang proteksiyon ng VIP at ng buong biodiversity ng bansa.
Para kay Bishop Alminaza, ang kasalukuyang yugto ay isang panawagan sa moral na pananagutan upang hindi na maulit ang trahedyang patuloy na nagpapahirap sa mga komunidad sa VIP.
“This is a moment for moral courage. When justice is delayed, injustice deepens, and when protection is postponed, another disaster becomes inevitable. The communities of the Verde Island Passage cannot wait another year,” saad ni Bishop Alminaza.
