22,454 total reads
Inihayag ni Tagbilaran Bishop-elect Gerardo Saco Jr. ang malinaw na direksyon ng kanyang paglilingkod bilang pastol ng diyosesis sa pamamagitan ng kanyang episcopal motto na “Confortare ego sum.”
Hango mula sa Ebanghelyo ni San Mateo 14:27, ang mensaheng ito ay tahasang panawagan ng Panginoon na “Take courage, it is I; do not be afraid.”
Ayon sa paliwanag sa kanyang coat of arms, ang mga salitang ito ay paalala ng patuloy na presensya ni Kristo sa gitna ng mga pagsubok at hamon ng buhay at isang paanyaya sa pananampalatayang may lakas ng loob.
Binibigyang-diin ng motto ang mensahe ng pamumuno ni Bishop-elect Saco, ang mahigpit na pagtitiwala sa Diyos sa kabila ng kawalang-katiyakan.
Ito rin ay ayon sa makasaysayang panawagan ni San Juan Pablo II nang mahalal itong Santo Papa noong 1978 na “Do not be afraid! Open the gates for Christ!” na malinaw na hamon sa Simbahan na maglingkod nang may tapang at bukás na puso.
“It is a constant reminder for the Bishop in entrusting himself and his ministry to Christ’s love and mercy,” ayon sa paliwanag ng episcopal motto ni Bishop-elect Saco.
Sa harap ng mga hamon ng makabagong panahon, malinaw ang direksyon ng bagong obispo ng Tagbilaran: ang isang Simbahang matatag, hindi natitinag ng takot, at handang sumunod sa tawag ni Kristo sa gitna ng anumang unos na haharapin.
Tampok sa episcopal coat of arms ni Bishop-elect Saco ang mga simbolo ng diyosesis at ang kanyang personal coat of arms kung saan itinatampok ang mga simbolo ng kanyang misyon at naging gawain sa lokal na simbahan mula nang maordinahang pari ng diyosesis noong 1993.
Si Bishop-elect Saco ang ikawalong Obispo ng Diyosesis ng Tagbilaran at inaasahang magsisilbing pastol na maghahatid ng lakas ng loob at pag-asa sa mananampalataya ng Bohol, lalo na sa isang milyong Katoliko.
Pormal na gagawaran ng episcopal ordination ang bishop-elect sa May 26 na pangungunahan ni Cebu Archbishop Alberto Uy bilang principal consecrator, katuwang ang mga kapwa Boholano bishops na sina Bishop Crispin Varquez ng Borongan at Bishop Socrates Mesiona ng Puerto Princesa, Palawan.
Samantala, si Papal Nuncio to the Philippines, Archbishop Charles Brown, naman ang magluluklok kay Bishop-elect Saco sa cathedra ng diyosesis.
