11,059 total views
Kinilala ni Lingayen-Dagupan Auxiliary Bishop Fidelis Layog ang kahalagahan ng pagdiriwang ng sentenaryo ng Minor Basilica of Our Lady of the Holy Rosary of Manaoag bilang tanda ng biyaya at pagmamahal ng Diyos sa mga mananampalataya.
Ayon sa Obispo, isang malaking biyaya ang pagdiriwang na ito para sa mga deboto at sa buong Simbahan.
Binigyang-diin ng Obispo na ang dambana sa Manaoag ay patunay ng patuloy na paggabay ng Diyos, lalo na sa mga panahong nanghihina ang tao dahil ang Diyos ay laging bukas at handang magbigay ng lakas at kalinga sa sinumang lalapit sa Kanya.
“Ito po ay isang kakaibang grasya na nagpapahiwatig ng pagmamahal ng Diyos, siya ay palaging bukas, palaging nagbibigay sa atin sa lahat ng panahon na tayo ay nanghihina. Ang kailangan po natin ay lapitan siya. And for 100 years, nasa harap po natin ang minor basilica na ito. Marami na po ang binigyan ng ating Ina ng pag-asa sa kanilang buhay pag-asa kasi sila’y napagaling sa kanilang sakit,” ayon sa panayam ng Radyo Veritas kay Bishop Layog.
Ayon pa kay Bishop Layog, sa loob ng 100-taon ay naging daluyan ng pag-asa ang dambana kung saan maraming deboto ang nakaranas ng kagalingan, lunas sa karamdaman, at solusyon sa kanilang mga suliranin.
Inilarawan din niya ang simbahan bilang patuloy na sumasama sa paglalakbay ng mga mananampalataya patungo kay Hesus at sa Diyos.
“At kapag kasama natin ang ating Ina, wala na tayong hihingin pa at higit pa bilang isang kasama, hindi isang Ina na nag-aaruga at nagyayakap sa atin. Sa mga panahon na tayo ay nangangailangan ng tulong at kalinga. So, God bless us all. God bless all of you, devotees of Our Lady of Manaoag,” bahagi pa ng panayam ng Radyo Veritas kay Bishop Layog.
Hinimok ng obispo ang mga deboto na patuloy na magtiwala at dumulog sa Mahal na Birhen, lalo na sa mga panahon ng pangangailangan. Ang ganitong panawagan ay umaayon sa adhikain ng Simbahan, sa ilalim ng pamumuno ni Pope Leo XIV, na palakasin ang pananampalataya at pag-asa ng mga mananampalataya sa gitna ng mga hamon ng buhay.
