7,608 total reads
Inilunsad ng himpilan ng Radyo Veritas ang “Krusada sa Pasada” campaign upang tulungan ang mga Public Utility Vehicle drivers na labis na naaapektuhan ng mataas na presyo ng mga produktong petrolyo at pangunahing bilihin.
Ayon kay Radyo Veritas President Fr. Roy Bellen, layunin ng kampanya na maiparating ang kalagayan ng mga driver at makahikayat ng malawak na pakikiisa.
“Sa mga kapanalig, ngayong mga araw na ito, alam na po natin lahat ang hirap ng buhay, lalo na sa ating mga tsuper. Sila po na halos araw-araw bumibiyahe at araw-araw kailangang bumili ng pang-gas para umandar ang kanilang sasakyan. Pero sila po ang hirap na hirap na ngayon,” ayon sa panayam ng Radyo Veritas kay Fr. Bellen.
Sa pamamagitan ng kampanya, magsasagawa ang himpilan ng mga programang magtatampok sa kalagayan ng sektor ng transportasyon at magpapalakas ng kamalayan ng publiko hinggil sa kanilang pinagdaraanan.
Binigyang-diin ni Fr. Bellen ang kahalagahan ng pagkakaisa ng komunidad sa gitna ng umiiral na hamon sa ekonomiya upang sama-samang itong mapagtagumpayan.
“At alam natin na kapag ang mga tsuper, ang ating mga lingkod sa transportasyon, ay nahihirapan, lahat tayo ay damay. Lalo na ang mga taong bumibiyahe at ang mga suplay na kailangang dalhin sa iba’t ibang lugar—lahat ito ay delikado at apektado. Kaya hinihiling ko po sa mga kapanalig na tayo ay maengganyong tumulong sa anumang paraan—sa pamamagitan ng mga inisyatiba at pag-oorganisa sa ating mga komunidad at pamilya—upang makatulong sa ating mga kapatid na tsuper,” bahagi pa ng mensahe ni Fr.Bellen.
Bagamat nagkaroon ng mga magkakasunod na rollback sa presyo kada litro ng mga produktong petrolyo, sa pagsisimula sa buwan ng Abril ay umabot sa
hanggang 120-piso ang kada litro ng gasolina, hanggang 170-piso naman sa kada litro ng diesel at hanggang 150-piso naman ang kada litro ng kerosene.
