893 total reads
Mga Kapanalig, maliban sa droga at krimen, may isa pang mabigat na problemang dapat pagtuunan ng pansin, hindi lamang ng mga kinauukulan kundi nating lahat. Ito ay ang commercial sexual exploitation na, kasabay ng pagbabago ng porma nito, ay pabatâ nang pabatâ ang mga nabibiktima.
Gaya na lamang ng prostitusyon. Ang Pilipinas ay sinasabing pang-apat sa mga bansang may pinakamaraming batang nabibiktima ng prostitusyon. Noong 2008, may tinatayang 60,000 hanggang 100,000 na mga bata ang naging biktima nito ayon sa NGO na ECPAT International. May kalumaan na ang datos na iyon, ngunit ang ganitong uri ng eksploytasyon sa mga kabataan ay hindi maikakailang namamayagpag pa rin.
Kahirapan ang sinasabing pangunahing ugat ng problema ng prostitusyon. Ngunit, Kapanalig, ang isyung ito ay higit nang naging kumplikado bunsod na rin ng pag-usbong ng modernong teknolohiya at pagbabago sa mga pananaw at pagpapahalaga o values ng mga tao.
Sa isang pag-aaral na ibinahagi kamakailan ng isa pang NGO na PLAN International, marami sa mga batang nakapanayam ang nagsabing kusa silang pumasok sa prostitusyon. Wala umanong pumilit sa kanila. Marami sa mga batang ito ay galing sa mahihirap na pamilya at pumasok sa kalakarang ito upang makatulong kanilang pamilya o tustusan ang kanilang pag-aaral. Nakababahala ring sa pamamagitan ng prostitusyon ay nabibili nila ang mga bagay na gusto nila gaya ng mga gadgets. Malaking impluwensiya ang kanilang mga kaibigang ganito rin ang trabaho at humimok sa kanilang ikalakal ang kanilang murang katawan.
Natuklasan din sa pag-aaral ang bagong modus o paraan kung papaano ginagawa ang prostitusyon. Kung dati ay may bugaw na mistulang tagalakò ng mga bata, ngayon ay may mga tinatawag na “freelancers”. Sila ang mga batang direktang nakikipag-usap sa customers sa pamamagitan ng Facebook, mga pornographic websites, at mga sumisikat ngayong mobile chat applications. Marami sa mga batang nadadawit sa prostitusyon ay nagsabing nakaranas sila ng pisikal na pang-aabuso sa kamay ng kanilang mga parokyano. May ilan ding umaming nahawahan sila ng sexually transmitted diseases.
Mga Kapanalig, nakababahala ang resulta ng pag-aaral na ito. Patuloy na lumalaki ang hamon kung papaano pupuksain ang prostitusyon at iba pang porma ng commercial sexual exploitation katulad ng human trafficking at pornograpiya. Tunay ngang ang prostitusyon—ito man ay sapilitan o bunga ng sariling desisyon—ay mapanganib sa kalusugan ng tao, maaaring humantong sa pang-aabuso, at higit sa lahat, nakapagpapababa sa dignidad ng tao. Ang lumalalang kahirapan, lumalaganap na materyalismo, at pagkasira ng mga pagpapahalaga o values ng mga tao ay ilan sa mga sanhi ng problemang ito.
Sa mga katuruang panlipunan ng Santa Iglesia na Evangelium Vitae at Gaudium et Spes, itinuturing ang prostitusyon at anumang porma ng sexual exploitation na lantarang paglapastangan sa dignidad ng tao. Nilalason din ng mga ito ang ating lipunan. Ang kultura ng materyalismo na bumabalot sa mundo ng ating mga kabataan ngayon—marahil sa kagustuhan din nilang sumunod sa uso at maging “in” sa kanilang mga kaibigan—ay kailangang bantayan at agarang maituwid. Pinaalalahanan na tayo ni Pope Francis sa isang misa noong 2013: kapag hinahayaan nating mangibabaw ang materyalismo sa ating buhay, nagiging makasarili tayo, kumakapit tayo sa mga materyal na bagay na ninanakaw ang ating pagkatao. Huwag nating hayaang malunod sa daluyong ng materyalismo ang ating mga anak, mga kapamilya, at ang ating sarili mismo.
Mga Kapanalig, ang commercial sexual exploitation sa mga kabataan ay hindi lamang malulutas sa pamamagitan ng pag-angat sa antas ng pamumuhay ng mga pamilya. Kailangan ding maibalik ang pagpapahalaga ng tao sa payak at sapat na pamumuhay. Dito mahalaga ang papel ng mga magulang, katuwang ang mga guro at mga taong Simbahan. Maging mapagbantay, dahil baka ang masamang gawaing ito ay nagsisimula nang lasunin ang kaisipan ng ating mga anak.
Sumainyo ang katotohanan.
