72,555 total reads
Hinikaya’t ni Manila Archbishop Jose Cardinal Advincula ang mananampalatayang Kristiyano na maglingkod at manalangin ng buong kababaang loob at ganap na pagtitiwala sa Panginoon.
Ito ang bahagi ng mensahe ng Cardinal sa ginanap na misa sa Manila Cathedral kaugnay sa paggunita ng Ash Wednesday- ang hudyat ng pagsisimula ng Kwaresma.
Sa kaniyang homiliya binigyan tuon ng arsobispo ang abo at Krus, na sumisimbolo ng ating, pagsisi at paghahanda ng ating kalooban para kay Hesus na nagpakasakit, namatay at muling nabuhay para sa kaligtasan ng sangkatauhan.
“Let us pray and serve with humility and total dependence on God.” Ayon pa sa homiliya ni Cardinal Advincula.
Paalala pa ng pinunong pastol ng Maynila na ang abo ay nangangahulugan din na ang lahat ng bagay sa mundo ay lumilipas at may katapusan, subalit hindi ang pagmamahal ng Panginoon.
Giit ni Cardinal Advincula, ang salapi, katanyagan at kapangyarihan ay nawawala, gayundin ang kagandahan at kalusugan na lumilipas sa pag-usad ng panahon.
“Hindi forever ang mga bagay sa mundo kahit pa anong pilit natin, pero minsan niloloko natin ang sarili natin. Tinatago natin ang ating yaman sa halip na linangin at ibahagi. Sinasakim natin ang poder, sa halip na gamitin sa wagas na paglilingkod. Inaabuso natin ang kalikasan sa halip na alagaan. Nag-aadik tayo sa sarap at saya, o nagtatanim ng galit o nag-iipon ng lungkot o nagtatago ng takot sa halip na magbukas o mag-alay ng sarili sa pagmamahal at pagmamalakasakit,” bahagi ng homiliya ni Cardinal Advincula.
Giit ni Cardinal Advincula, hindi sa mundo matatagpuan ang walang katapusan kundi tanging matatagpuan sa piling ng Ama sa langit.
“Ang forever ay ang biyayang galing sa Langit at ito ang dahilan kung bakit hugis Krus ang abo na ipapahid sa noo natin. Ang hugis Krus ay paalala sa nag-iisang forever at iyon ay ang pagmamahal ng Diyos, pagmamahal na walang hanggan, pagmamahal na walang pasubali. Ito lang ang mapanghahawakan natin at ang totoong tumatagal at tumutuloy ay ang mahabaging pagmamahal at ang ganap na katarungan ng ating Ama sa langit.”
Ang Miyerkules De Ceniza ay isang tradisyon ng mga Katoliko na paglalagay ng abo sa noo na sumisimbolo ng kamatayan, pagbabalik-loob, at pagbabago.
Ito rin ang hudyat ng pagsisimulang 40 araw na paghahanda sa pagpapakasakit, pagkamatay at muling pagkabuhay ni Kristo.
