276 total views
Nagpahayag ng pakikiisa at suporta ang ilang lider ng Simbahang Katolika kay Bayombong Bishop Jose Elmer Mangalinao sa gitna ng mga kasong kinakaharap kaugnay ng pagsusulong ng adbokasiyang pangangalaga sa kalikasan at kapakanan ng mga pamayanang nasasakupan ng diyosesis.
Sa kanyang mensahe, inilarawan ni Kalookan Bishop Pablo Virgilio Cardinal David ang kasalukuyang sitwasyon ng obispo bilang isang panibagong pagsubok matapos malampasan ang malubhang karamdaman ilang taon na ang nakalipas.
Ayon kay Cardinal David, minsang ipinagdasal ng mga mananampalataya ang paggaling ni Bishop Mangalinao matapos itong makaranas ng atake sa puso at sumailalim sa quintuple bypass surgery.
“Today, he faces a different ordeal. Having taken a public stand on issues affecting the environment and the communities entrusted to his care, he now finds himself confronting legal challenges arising from that advocacy,” ayon sa Cardinal David.
Binigyang-diin ng kardinal na nananatiling matatag ang obispo sa kabila ng mga pagsubok na kanyang kinakaharap.
“Whether fighting for his own life or standing up for what he believes is life-giving for his people, Bishop Elmer has never lacked courage,” ayon sa kardinal.
Tinukoy rin ng kardinal ang mas malalim na kahulugan ng pakikibaka ni Bishop Mangalinao para sa kalikasan at sa kapakanan ng mamamayan.
“From fighting for his life to fighting for life itself,” ani Cardinal David.
Samantala, nagpahayag din ng pakikiisa si Tuguegarao Archbishop Ricardo Baccay para kay Bishop Mangalinao at sa lahat ng nagsusulong ng pangangalaga sa kalikasan.
“Today, we pray for the Diocese of Bayombong, for Bishop Jose Elmer Mangalinao, and for all who courageously work to protect our common home,” ayon kay Archbishop Baccay.
Iginiit ng arsobispo na ang pangangalaga sa kalikasan ay hindi lamang usaping pangkapaligiran kundi isang mahalagang tungkuling moral lalo na ng mga pastol ng simbahan.
“May their witness remind us that caring for the earth is not only an environmental concern but a moral responsibility,” dagdag pa ng arsobispo.
Ang mga pahayag ng dalawang lider ng Simbahan ay nagpapakita ng lumalawak na suporta para kay Bishop Mangalinao habang kinakaharap nito ang mga legal na usaping kaugnay ng kanyang adbokasiya para sa kalikasan at pagtatanggol sa mga komunidad na apektado ng mga suliraning pangkapaligiran.
Batay sa ulat, kinasuhan si Bishop Mangalinao, kasama ang iba pang environmental advocates, dahil sa mariing pagtutol sa isinasagawang exploration activities ng North Luzon Minerals Resources Corporation (NLMRC) sa Kasibu, Nueva Vizcaya.
Nakasentro ang usapin sa planong exploration sa 4,456-hektaryang lupain na sumasaklaw sa mga lugar ng Pao, Kakidugen, Pacquet, Dine at Catarawan sa Kasibu.
Patuloy namang hinihikayat ng mga opisyal ng Simbahan ang mga mananampalataya na ipanalangin ang Diocese of Bayombong at si Bishop Mangalinao, habang naninindigan sa pananagutan ng bawat isa na pangalagaan ang sangnilikha bilang bahagi ng kanilang pananampalataya at moral na tungkulin.
