20,698 total reads
Hinimok ng Diocese of Sorsogon ang mga parokya, paaralan, religious communities, at iba pang ecclesial communities na hikayatin ang mga bata at kabataan na makiisa sa “One Million Children Praying the Holy Rosary.”
Itinakda ng Aid to the Church in Need (ACN) Philippines ang taunang inisyatiba sa October 7 kasabay ng pagdiriwang ng kapistahan ng Mahal na Birhen ng Santo Rosaryo.
Sa liham sirkular ni Sorsogon Bishop Jose Alan Dialogo, hinihikayat ang mga parokya at paaralan na magsagawa ng sama-samang pagdarasal ng Santo Rosaryo.
Ayon sa obispo, layunin ng pandaigdigang panalangin na pagbuklurin ang mga bata mula sa iba’t ibang panig ng mundo sa paghingi ng kapayapaan para sa mga pamilya, komunidad, Simbahan at buong mundo.
“I particularly commend this initiative to our children and young people, who, through their simple and sincere prayer, can become true little pilgrims of hope, bringing the light of Christ and the peace of God to our families and to our troubled world,” ayon kay Bishop Dialogo.
Hinimok din ng obispo ang mga kabataan na muling tuklasin ang kagandahan ng Santo Rosaryo bilang panalangin ng pagmumuni-muni, pagtitiwala at pakikipagkaisa sa Mahal na Birheng Maria.
Isasagawa ang pangunahing pagdiriwang ng ACN sa San Sebastian Cathedral School of Tarlac sa Diocese of Tarlac, mula alas-8 ng umaga hanggang alas-11:30 ng umaga.
Hinihikayat ang mga parokya, paaralan at komunidad na magsagawa ng kani-kanilang pagtitipon para sa sama-samang pagdarasal, habang maaaring makiisa online ang mga hindi makadadalo nang personal.
Hinikayat ni Bishop Dialogo ang mga mananampalataya na makiisa sa milyun-milyong bata sa buong mundo sa pag-aalay ng kanilang mga panalangin para sa kapayapaan sa pamamatnubay ng maka-inang pagkalinga ng Mahal na Birhen ng Santo Rosaryo.
