26,691 total reads
Hinimok ng isang political analyst ang publiko na patuloy na subaybayan ang impeachment trial laban kay Vice President Sara Duterte, lalo na ang pagtalakay sa maling paggamit ng confidential funds na kabilang sa Article 1 ng impeachment.
Sa panayam sa programang Veritas Pilipinas, sinabi ni Dr. Christopher Mantillas, Associate Professor ng Institute for Governance and Rural Development ng University of the Philippines Los Baños, na mahalagang maunawaan ng publiko ang mga isyung tinatalakay sa Senado sapagkat may kinalaman ito sa pananagutan ng mga opisyal ng pamahalaan.
Ayon kay Mantillas, nakatuon na ang paglilitis sa Article 1, na tumatalakay sa maling paggamit ng confidential funds, kabilang ang kontrobersyal na ₱125 milyong confidential fund ng Office of the Vice President at ang mahigit isang daang disbursement na isinagawa sa loob lamang ng isang araw.
“Napakahalaga na masubaybayan ito ng mga tao dahil pagkatapos ng Article 1 ay maaari nang talakayin ang Article 2 tungkol sa unexplained wealth, at posibleng sumunod din ang Article 3 na may kinalaman sa bribery at procurement irregularities.” Bahagi ng pahayag ni Mantillas sa Radyo Veritas.
Ipinaliwanag ni Mantillas na ang testimonya ng mga state auditors at mga opisyal ng bangko ay nagbigay ng mahahalagang impormasyon hinggil sa hindi pangkaraniwang paraan ng paglalabas ng pondo ng bayan na nagdudulot ng mga katanungan kaugnay ng transparency at accountability ng mga opisyal ng pamahalaan.
“Kapag tayo ay namamahala, may sinusunod tayong mga prinsipyo ng good governance tulad ng rule of law, transparency, at accountability. Kapag may mga pangyayaring nagiging kaduda-duda, mahalagang mabigyang-linaw ito.” Dagdag pa ni Mantillas.
Binigyang-diin din ng propesor ang command responsibility, kung saan sinabi niyang hindi maaaring ihiwalay ang pananagutan ng pinuno ng isang ahensya sa paggamit ng pondo ng gobyerno.
“Hindi puwedeng may perang na-disburse na hindi nalalaman ng head of agency. Bago magamit ang pondo ng gobyerno, dumaraan ito sa iba’t ibang proseso at pag-apruba.” Ayon pa kay Mantillas.
Nagbabala rin si Mantillas laban sa mga pagtatangkang impluwensyahan ang opinyon ng publiko sa pamamagitan ng social media habang nagpapatuloy ang paglilitis.
Hinimok naman ng propesor ang publiko na umasa lamang sa mga mapagkakatiwalaang ulat ng media, mga eksperto, at mga legal na paliwanag upang higit na maunawaan ang mga usaping teknikal sa nagaganap na impeachment trial.
“Mag-ingat tayo sa mga naririnig natin sa social media dahil maaaring ma-weaponize ang impormasyon sa labas ng legal na proseso.” Ani Mantillas.
Sa bahagi ng Simbahang Katolika, ang mabuting pamamahala ay dapat na nakaugat sa katotohanan, pananagutan, at paglilingkod sa kabutihang panlahat kung saan tinatawagan ang mga lingkod-bayan na maging tapat na katiwala ng pondo ng sambayanan at pairalin ang transparency at integridad sa kanilang panunungkulan, upang mapanatili ang tiwala ng mamamayan at maisulong ang tunay na katarungan at kabutihang panlahat.
