533 total reads
Iminungkahi ng CBCP – Permanent Committee on Public Affairs sa mga employers sa bansa na laging isaalang – alang ang mga “social benefits” ng mga manggagawa.
Ayon kay Lipa, Batangas Archbishop Ramon Arguelles, chairman ng komisyon, suportado nito ang kampanya ni Pangulong Rodrigo Duterte na labanan ang talamak na “end of contract” o ENDO sa bansa kung saan umaabot sa 2 milyong manggagawa ang nawawalan ng trabaho kada taon.
Sinabi pa ni Archbishop Arguelles, dahil sa mga pansariling interes na kumita ng malaki ng ilang mga negosyante ay naisasantabi ang pagpapasahod ng sapat sa kanilang mga empleyado.
“Alam niyo ang pangako ng gobyerno tama yan eh na yung pagsugpo sa kontraktuwal. Kasi iniiwasan ng mga mayayaman na magbayad sila ng social benefits dapat ang sweldo rin ng mga tao ay karapat – dapat para sa ikabubuhay ng pamilya hindi lang yung isang tao, pamilya yan. Kaya ako ay pabor diyan at ang principle namin na ang pandarayang yan ay dapat ng matapos,” bahagi ng pahayag ni Archbishop Arguelles sa panayam ng Veritas Patrol.
Samantala, maliwanag sa batas na ipinagbabawal ang contractualization alinsunod sa Security of Tenure clause ng Konstitusyon.
Nakaasaad na ipinagbabawal rin ito sa Article 280 ng Labor Code na nagsasabing kapag ang trabaho ng isang manggagawa ay kapaki – pakinabang sa isang kumpanya dapat siyang ituring na regular na empleyado.
Nauna na ring binanggit ni Pope St. John Paul II sa kanyang encyclical na Centinnus Annus na ang isang lipunang hindi kinikilala ang karapatan sa paggawa ng mga mamamayan sa pamamagitan ng pagpapairal ng sistematikong pagdadamot sa kanila ng pagkakataong makamit ang sapat na sahod ay hindi kailanman makatwiran.
