Nakikiisa si Fr. Marlito Ocon, SJ, head chaplain ng University of the Philippines – Philippine General Hospital (UP-PGH), sa matinding pagkondena ng Society of Jesus Social Apostolate (SJSA) laban sa malawakang katiwalian sa pamahalaan.
Bilang kinatawan ng simbahan at pribadong sektor na katuwang ng UP-PGH, binigyang-diin ni Fr. Ocon ang matinding pinsala ng katiwalian sa kalusugan at buhay ng mga mahihirap.
Ayon sa pari, maging ang UP-PGH ay biktima rin ng katiwalian sa flood control project na nagdudulot ng patuloy na pagbaha at labis pang nagpapahirap sa charity patients ng institusyon.
“Taon-taon na lang binabaha ang UP-PGH Manila, bilang isa sa mga saksi ng kahirapan na dinaranas ng ating mga maralitang kapatid na may sakit at lubhang naghihirap dahil sa kakulangan ng pondo, ang PGH Catholic Chaplaincy ay lubos na sumusuporta at nakikiisa sa panawagan at pahayag na ito ng Society of Jesus Social Apostolate,” pahayag ni Fr. Ocon.
Iginiit pa ni Fr. Ocon na ang pagmamalabis ng ilang opisyal ng pamahalaan sa kaban ng bayan ay labis na nakakakagalit, lalo na kung isasaalang-alang ang kalagayan ng mga Pilipinong patuloy na naghihirap dahil sa pagbaha at matinding kahirapan.
“Ang pinag-usapan na billion-billion na nilustay ay hindi lamang nakakadismaya o nakakalungkot, kundi totoong nakakagalit,” dagdag ni Fr. Ocon.
Una nang binigyang-diin ng Society of Jesus Social Apostolate ang ulat ng World Bank, Asian Development Bank, at International Monetary Fund noong 2024 na tinatayang ₱2 trilyon kada taon ang nawawala sa pamahalaan dahil sa katiwalian, bukod pa sa datos ni Senator Panfilo Lacson na halos ₱1 trilyon sa pondong inilaan para sa flood control projects sa nakalipas na dekada ay napunta lamang sa bulsa ng mga tiwaling opisyal at kumpanya.
