629 total views
Mga Kapanalig, sa Tito 2:7, mababasa natin ang mga salitang ito: “Sa lahat ng paraan, maging halimbawa ka ng mabuting ugali at maging tapat ka at kagalang-galang sa iyong pagtuturo. Nararapat na pananalita ang lagi mong gamitin upang hindi mapintasan ninuman ang iyong mga sinasabi.”
Akma itong paalala sa sinumang naatasan ng malaking responsibilidad na mamuno. Totoong mahirap gampanan ang tungkulin ng mga namumuno sa atin, ngunit kailangan nilang magsumikap na gawin ang tama, matuwid, at makatarungan dahil tinitingala sila ng kanilang mga pinamumunuan. Kaya tunay na nakalulungkot kapag may mga pinuno tayong hindi pinangungunahan ang kanilang mga sarili sa pinakamataas na pamantayan.
Isa sa mga pamantayang ito ang pagpapahalaga at pagtatanggol sa katotohanan, ang hindi pagsisinungaling o pagbabaluktot ng kung ano ang totoo. Hindi natin ito makita sa pinakabagong pahayag ni Lieutenant General Antonio Parlade, ang tagapagsalita ng National Task Force to End Local Communist and Armed Conflict. Aniya, “recruitment havens” o kanlungan ng mga recruiters ng mga rebeldeng komunista ang 18 kolehiyo at pamantasan sa bansa. Kasama rito ang mga Catholic universities katulad ng De La Salle University, Ateneo de Manila University, at University of Santo Tomas. Laganap daw ang recruitment sa mga mag-aaral sa mga paaralang ito upang sumapi ang mga kabataan sa New People’s Army (o NPA).
Sa pahayag ng mga pangulo ng ilan sa mga pamantasang idinawit, iginiit nilang iresponsable ang ginawa ni General Parlade dahil wala siyang ipinakikitang ebidensya. Nakababahala ang paratang na ito ng lider ng isang task force na naatasang tuldukan ang armadong tunggalian ng pamahalaan at ng mga rebeldeng grupo dahil maaaring malagay sa panganib ang buhay ng mga guro at mag-aaral sa mga paaralang ito. At taliwas ang pagpaparatang nang walang ebidensya sa mabuting katangian ng mga pinuno.
Nararapat ding asahan natin sa ating mga lider na maging positibong halimbawa sa kanilang mga pinamumunuan. Leadership by example, ‘ika nga. At ngayong may pandemya, lagi tayong pinaaalalahanang sumunod sa mga health protocols upang maiwasan ang paghahawahan at pagkalat pa ng COVID-19. Halos isang taon na rin tayong kailangang magsuot ng mask at hindi makapagdiwang kasama ng ating pamilya dahil bawal ang mass gathering. Ngunit ang mismong contact tracing czar na si Baguio City Mayor at dating PNP-CIDG chief Benjamin Magalong ang sumuway sa mga patakarang inaasahang sundin natin. Dumalo siya sa marangyang birthday party ng isang mayamang indibidwal sa isang hotel sa kanyang lungsod. Kumalat ang video kung saan makikitang hindi nasunod ang physical distancing at hindi nakasuot ng face masks ang maraming dumalo. Sa kanyang sagot sa mga bumatikos sa kanyang ginawa, sinabi niyang “tao lang” siya at nakalilimot na sumunod sa mga protocols sa sobrang kasiyahan.
Kabalintunaan ngang itinalaga ni Pangulong Duterte ang isang heneral upang wakasan ang rebelyon sa kanayunan at ang isang dating pulis upang pangasiwaan ang contact tracing sa bansa dahil sa aniya’y disiplinang mayroon sila dahil sa kanilang pagsasanay bilang sundalo at pulis, ngunit hindi natin ito nakikita sa kanila. Hindi masasabing “disiplina”—o mahusay na pamumuno—ang makikita natin sa pagpapakalat ng maling impormasyong naglalagay sa panganib sa mga inosenteng mamamayan at pagsuway sa mga regulasyong ipinatutupad upang maiwasan ang mabilis na pagkalat ng isang nakamamatay na sakit.
Mga Kapanalig, common good o ang kabutihang panlahat ang isa sa mga saligang prinsipyo sa mga panlipunang turo ng Simbahan. Isa rin prinsipyong dapat gumagabay sa ating mga pinunong naatangan ng tungkuling pangalagaan at itaguyod ang kapakanan nating lahat sa pamamagitan ng pagtatanggol sa katotohanan at pagiging mabuting halimbawa sa lahat. Tumatalikod dito ang ating mga pinunong nagpapakalat ng kasinungalingan at nagiging halimbawa ng paggawa ng mali.
