270 total views
Umaasa si Novaliches Bishop Emeritus Teodoro Bacani Jr. na habang tumatagal ay mas lalaki pa ang bilang ng mga deboto ng Mahal na Poong Hesus Nazareno.
Ayon sa obispo, nagagalak naman siya sa mga ulat, na dagsa ang mga kabataan sa Traslacion ng imahen dahil tanda ito na ang debosyon ay magpapatuloy dahil sa mga kabataan.
Dagdag ni Bishop Bacani, tanda ito na may pag-asang naghihintay para sa lahat ng mga mananampalataya.
“Dahil sa kabataan, ang dami na nilang dumadalo sa debosyon ito ay isang tanda na ang debosyong ito ay nagpapatuloy at hindi mamamatay dahil mga kabataan na ang sumasali dito ngayon yan ang unang napakagandang sign ng pagasa para sa lahat.” pahayag ni Bishop Bacani sa panayam ng Radio Veritas.
Kaugnay nito, pinayuhan ng obispo ang mga deboto ng Itim na Nazareno na sabayan ng pagpapalalim ng pananampalataya ang kanilang debosyon.
Dagdag ni bishop Bacani, maganda rin ang ginagawang pagpapaliwanag ng mga namamahala sa Quiapo Church bago ang bawat Misa para na rin maliwanagan pa ang mga tao sa tunay na kahalagahan ng pagpapalalim ng pananampalataya.
“Harinawa itong pagdami ng deboto sabayan natin ng pagpapalalim ng kanilang kaalaman tungkol sa ating pananampalataya. Sa Quiapo Church maganda ang pagpapaliwanag na ginagawa bago mag-Misa. Kahapon, mismong araw ng Traslacion bago mag-Misa merung paliwanag na magandang ginagawa. Hariwana, atin itong ipagpatuloy na gagawin upang ang pananampalataya ng mga tao ay enlightened o naliliwanagan at hindi lamang emosyon o religiosity. Kapag ito ay may diwa talagang pinapakita nito ang buhay ng Diyos, buhay ng ordinaryong tao na ang kanya espiritu ay kumikilos kahit sa mga sinasabi nating maliliit, hindi masyadong nakapag-aral, kahit hindi Teologo talagang ang Holy Spirit at nandiyan at pinapakita nilang presensiya ng Espiritu ay sa alab ng kanilang pagmamahal sa Panginoon,” ayon pa sa obispo.
Samantala, generally peaceful ang Traslacion ng Mahal na Poong Hesus Nazereno na tumagal ng 22 oras dahil walang naitalang anumang untoward incident at walang casualties.
Ayon naman kay NCRPO director Chief Supt. Oscar Albayalde, nasa 2.5 milyon ang kanilang crowd estimate sa mga nakilahok sa Traslacion ngayong taon.