3,318 total views
Ipinapanalangin ni Daet Bishop Rex Andrew Alarcon ang kaligtasan ng lahat mula sa pananalasa ng Bagyong Paeng.
Ayon sa Obispo, bukod sa paghahanda ay mahalaga rin ang pananalangin upang ipag-adya ng Panginoon ang bawat isa mula sa anumang pinsala na maaring idulot ng bagyo.
Pagbabahagi ni Bishop Alarcon, ang pananalangin para sa kaligtasan ng lahat ay isa ring paraan ng pakikiisa para sa mga kababayan nating nakararanas na ng hagupit ng Bagyong Paeng.
Ipinaliwanag ng Obispo na sa kabila ng distansya o layo sa isa’t isa ay magkakasama pa rin ang lahat sa diwa at pananalig sa Panginoon na hindi kailanman pababayaan ang sinuman sa oras ng pangangailangan.
“Dalangin ko ang kaligtasan ng lahat. Ipaubaya natin ang ating mga sarili sa Panginoon habang ginagawa natin ang nararapat na paghahanda sa pagdating ng bagyo. Ang ating panalangin at pakikiisa sa mga kapatid nating nakararanas ng hagupit ng bagyo. Malayo man, magkakasama tayo sa diwa at pananalig sa Panginoon,” ang dalangin ni Daet Bishop Rex Andrew Alarcon.
Ang Bagyong Paeng na ang ika-16 na bagyo ngayong taon mula sa halos 20-bagyo na karaniwang nananalasa sa bansa kada taon.
Una ng tiniyak ng mga Social Action Centers na nakahanda ang Disaster Risk Reduction Response ng bawat ng diyosesis upang tulungan ang mga nangangailangan at maaaring mga maapektuhang residente ng mga pagbaha o pagguho ng lupa dulot ng mga pag-ulan dahil sa bagyo.
Read:
Naunang hiniling sa panginoon nina Ozamis Archbishop Martin Jumoad at Surigao Bishop Antonieto Cabajog ang kaligtasan ng mamamayan sa pinsalang dulot ng bagyong Paeng sa bansa.
Read:
Kaligtasan ng mamamayan sa pananalasa ng bagyong Paeng, panalangin ni Bishop Cabajog
Ipag-adya ang bansa sa pinsala ng Bagyong Paeng, hiling ng Arsobispo sa Panginoon
