234 total views
Magtatayo ng Caritas Manila ang isang warehouse para sa relief goods sa Mindanao.
Ayon kay Fr. Emerson Luego, Social Action Center director ng Diocese of Tagum at ng Visayas – at siya ring head ng Caritas-Mindanao, ito ay upang maging madali ang pamamahagi ng tulong sakaling magkaroon ng kalamidad sa Mindanao at mga kalapit na lalawigan.
Ilalagay ang emergency warehouse sa Sagrado Corazon Parish, Bermudez Compound, Apokon, Tagum, Davao City para mapag-imbakan ng mga donasyon mula sa Caritas Manila at Radyo Veritas.
“May area na tayo na inilaan diyan para sa gagawin na warehouse. At ang role niyan we could accommodate halimbawa may mga sakuna sa Mindanao diyan natin store lahat ng mga goods na ibinibigay ng mga kababayan natin from Luzon and Manila na mga tulong na ipinapadala nila sa Caritas Manila at Radio Veritas para tulad sa dati na maipahatid agad natin doon mismo sa mga concern,” bahagi ng pahayag ni Fr. Luego sa Radyo Veritas.
Suportado rin ni Fr. Luego ang mga programa ng Caritas Manila tulad ng Caritas YSLEP o Youth Servant Leadership and Education Program na may 5 libong iskolar sa buong bansa.
Nais din ni Fr. Luego na palakasin at pagkakaroon ng pagkakataon ng mga micro entrepreneur sa Mindanao tulad ng pagtatayo ng Caritas Margins – Mindanao branch.
“Maraming programa tulad ng YSLEP at tinatignan rin natin makagawa ng Caritas Margins dito sa Davao. Para naman yung mga programa sa ibat ibang dioceses lalo na yung mga tinatawag nating products of the poor ay matulungan po kasi yun ang naging problema lagi may mga programa tayo para matulungan yung mga mahihirap mabigyan ng technology pero at the end of the day wala ring sustainability dahil Hindi man mai- market yung na – produce nila na produkto. Itong programa ng Caritas Margins napakalaking bagay nito dahil diyan mo makikita na ang mga mahihirap nating kababayan ay matulungan talaga sila na ma- market yung mga produkto nila,” bahagi ng pahayag ni Fr. Luego sa Veritas Patrol.
Bukod sa Tagum, ilang pang lugar ang paglalagyan ng warehouse ng Caritas Manila kabilang na dito ang mga lugar tulad ng Cagayan De Oro, Leyte, Bicol at Nueva Ecija na magsisilbing emergency relief operation site na tutugon sa panahon ng sakuna.
Isa ang Typhoon Pablo sa pinakamalakas na bagyo na nanalasa noong 2012 sa Mindanao region kung saan higit sa 1,000 ang nasawi habang naitala naman P8.5 bilyong ang mga nasirang mga pananim.
Sa ulat ng Pagasa, karaniwan na ang higit sa 20 bagyo ang pumapasok sa bansa kada taon.
