463 total views
April 2, 2020-9:47am
Malaki ang maiaambag ng mga kabataan sa pagpapalalim ng pananampalataya kahit sa simpleng pamamaraan sa kabila ng mga limitasyong dulot ng umiiral na Luzon-wide Enhanced Community Quarantine dahil sa COVID-19 pandemic.
Ito ang ibinahagi ni Catholic Bishops Conference of the Philippines–Episcopal Commission on Youth Executive Secretary Rev. Fr. Cunegundo Garganta sa maaring maiambag ng mga kabataan ngayong panahon ng Kwaresma bilang paghahanda sa Mahal na Araw.
Paliwanag ng Pari sa pamamagitan ng taimtim na pananalangin, pakikinig sa mga payo at paalala ng mga nakatatanda at paggawa ng kabutihan ay malaki na ang mababahagi ng mga kabataan sa makabuluhang paghahanda para sa Mahal na Araw.
“Malaki na ang maiaambag ng mga kabataan panalangin, pakikinig sa mga nakatatanda sa mga paalaala at pagpapayo, pangatlo paggawa ng kabutihan sa pamamagitan din ng pagtatama para sa kapwa kabataan kung para sa mabuti huwag silang mangilag o huwag silang mag-alinlangan na maging bahagi ng pagbabago ng kapwa kabataan,” pahayag ni Fr. Garganta sa panayam sa Radyo Veritas.
Nauna ng inihayag ni Daet Bishop Rex Andrew Alarcon – chairman ng kumisyon na nawa ay maging daan ang kasalukuyang Enhanced Community Quarantine upang mamulat ang kabataan sa kahalagahan ng mga bagay na kadalasang naisasantabi lamang sa pang-araw-araw.
Ayon sa Obispo, nawa ay mas maunawaan ng mga kabataan ang kahalagahan ng oras para sa pamilya, sa pagninilay at pananalangin kasabay ng implementasyon ng Luzon Wide Enhanced Community Quarantine ngayong panahon ng Kwaresma na maituturing din na sapilitang pagsasailalim sa retreat ng bawat isa.
Nagsimula ang implementasyon ng isang buwang Luzon-wide Enhanced Community Quarantine noong ika-15 ng Marso at inaasahasang magtatapos sa ika-14 ng Abril.
