340 total views
Nanawagan ang opisyal ng Catholic Bishops Conference of the Philippines (CBCP) sa mga kandidato at botante sa nakatakdang Sangguniang Kabataan at Barangay elections na gamitin ang kapangyarihan ng halalan para sa tunay na serbisyo publiko.
Ayon kay Fr. Cunegundo Garganta, Executive Secretary ng CBCP-Episcopal Commission on Youth- kandidato man o mga botante ay dapat na gamitin ang boto at pagiging halal na opisyal ng barangay sa kabutihan ng mas nakakarami at hindi para sa sariling interes.
“We wish that their interest to be part of serving the community is coming from the idea of genuine service-that there is a degree of level of offering of oneself for the good of the others. Yung kabutihan ng nakakarami ay kanilang pangalagaan at ito ang kanilang talagang malalim na dahilan para sa pagkakaisa at pagkamit ng kapayapaan. Hindi para lamang maiangat ang kanilang sarili kundi makita ito bilang paraan ng isang paglilingkod at paanyaya sa pagbibigay ng talino, panahon, kalakasan para sa bayan para sa kapwa Filipino,”
Patuloy naman ang paghikayat ng Catholic Bishops Conference of the Philippines (CBCP) sa publiko na huwag balewalain ang kasagraduhan ng pagboto na mahalagang sangkap ng demokrasya at unang hakbang para sa pagbabago ng lipunan.
Sang-ayon sa Panlipunang katuruan ng Simbahan, ang malayang pagpili ng mga kandidato at ang pagboto sa mga ito ay karapatan ng bawat mamamayan na hindi dapat pigilan at bagkus ay dapat pang itaguyod at pangalagaan ng pamahalaan
Itinakda ang halalan sa Mayo 14 makaraang dalawang ulit na maantala. Ito ay orihinal na itinakda noong October 2016 at October 2017.
Batay sa datos ng National Statistical Coordination Board (NSCB) umaabot sa 42,027 ang kabuuang bilang ng mga barangay sa buong bansa.
Sa pinakahuling ulat, higit sa isang milyon ang nagfile ng kanilang certificate of candidacy sa kabataan at barangay election para sa may 900 libong posisyon ayon sa pahayag ng Commission on Elections.
