3,013 total reads
Pinaiigting ni Legazpi Bishop Joel Baylon ang misyon ng simbahan sa nasasakupang kawan.
Itinatag ng Diocese of Legazpi nitong July 1, 2023 ang tatlong bagong mission churches na makatutulong sa paghuhubog ng espiritwalidad ng halos isa punto limang milyong katoliko sa lalawigan ng Albay.
Sa kautusan ng obispo itinatag ang mission churches sa Naga (Baño) sa Tiwi na binubuo ng mga Barangay Sogod, Cale, Putsan at Cararayan; PARMABICQ sa Camalig na binubuo ng Barangay Pariaan, Manawan, Binanderahan, Cabraran Pequeño at Quinartilan; at ang San Jose sa Malilipot na binubuo ng Barangay Binitayan, San Roque at Calbayog.
“These new missions are aimed at fostering a deeper spiritual life and strengthening the bonds of faith within our communities.” bahagi ng pahayag ni Bishop Baylon.
Itinalaga ni Bishop Baylon si Fr. Cipriano Ante na mangasiwa sa Naga (Baño), si Fr. Alwin Relorcasa naman sa PARMABICQ habang si Fr. Diogenes Barja naman sa San Jose.
Bukod sa mga pari nagtalaga rin ang obispo ng mga seminarista na magiging katuwang sa mga Mission Priests sa pagsasagawa ng pag-aaral at pagbibigay katesismo sa mamamayan sa mga turo ng simbahan bilang paghahanda sa pagtatag ng Quasi – Parish.
Mananatili hanggang November 2023 ang mga seminarista sa nasabing mga lugar upang makipag-ugnayan sa pamayanan at tuklasin ang higit na pangangailangan gayudin ang kahandaan sa posibleng pagbuo ng bagong parokya.
Sa datos ng Catholic Hierarchy mula nang maitatag ang Diocese of Legazpi noong 1951 nasa 49 na ang parokya nito kung saan katuwang ni Bishop Baylon sa pagpapastol ang mahigit sa 100 mga pari.
Hiling ng obispo sa mananampalataya ang patuloy na panalangin sa mga pari at seminarista na inatasan sa bagong mission churches para sa matagumpay na gawaing pagpapastol.
“Let us keep our Mission Priests and the assigned Prediaconal Seminarians in our prayers as they undertake this important work for the growth and spiritual well-being of our Diocese. May the Holy Spirit guide and inspire them in their endeavors.” ani ng obispo.
