316 total views
Sinuspendi na ng Diocese of Pasig ang lahat ng mga misa at iba pang religious activities sa diyosesis ngayong araw bilang pag-iingat mula sa pananalasa ng bagyong Rolly.
Ayon kay Pasig Bishop Mylo Hubert Vergara, ang hakbang ay upang matiyak ang kapakanan at kaligtasan ng mga lingkod ng Simbahan kabilang na ang mga Pari, relihiyoso, relihiyosa at mga layko.
“Natapos lang yung mga misa sa umaga pero nung bandang tanghalian, nagbigay na ako ng directives sa lahat ng parokya to the parish priest na kanselado na lahat ang mga misa sa parokya para maging safe yung ating mga pari, religious at yung ating mga layko, parishioners natin, kinansel muna po natin ito para maging ligtas po tayo…” pahayag ni Bishop Vergara sa panayam sa Radyo Veritas.
Pagbabahagi ng Obispo, nakikipag-ugnayan na rin ang Caritas Pasig sa Caritas Manila kaugnay sa posibleng pagbibigay ng tulong sa mga maaapektuhan ng bagyong Rolly.
“May mga networks naman yung Caritas Pasig at yung Caritas Manila so sigurado ako nakikipag-ugnay na yung aking mga pari at mga layko yung mga in-charge para sa mga relief operation, katatapos lamang nung mga meeting nila recently so I could just think na yung mga risks disaster preparation and yung mga magaganap na kalamidad ay matutugunan…” pagbabahagi ni Bishop Vergara.