590 total views
Mga Kapanalig, pag-asa ang dulot sa atin ng mga balitang bumababa na ang mga kaso ng COVID-19, habang patuloy ang pagtaas ng bilang ng mga nabakunahan na. Kamakailan lang ay inuumpisahan na rin ang pagbabakuna kontra COVID-19 sa mga batang edad 12 hanggang 17. Dahil dito, muli nang nakakapamasyal ang mga bata, mas maluwag na ang mga restrictions, at ang pinakaimportante, matapos ang mahigit isang taong pakikipagbuno sa pandemya, muling bubuksan ang ilang eskwelahan sa pilíng mga lugar sa bansa. Noong nakaraang linggo, isandaang pampublikong paaralan mula sa low-risk areas ang kabilang sa pilot run ng limitadong face-to-face classes, at 20 pribadong paaralan naman ang magbubukas simula ngayong Lunes. Malaki at mahalagang hakbang ito upang mapabuti ang sitwasyon ng mga bata sa gitna ng pandemya, ngunit ibayong pag-iingat at paghahanda pa rin ang kailangang tiyakin.
Bago nagsimula ang pilot run ng face-to-face classes sa ating bansa, isa ang Pilipinas sa dalawang bansang kulelat sa pagbubukas ng mga paaralan simula nang inanunsyong may pandemya noong Marso 2020. Ayon pa naman sa mga pag-aaral, critical development stages o pinakamahalagang yugto ng pag-unlad ng mga bata ang mga unang taon sa elementarya. Sa paaralan sila natututong magbasa, magsulat, at magbilang. Doon din sila mag-uumpisang makihalubilo sa kapwa mag-aaral at mga guro. Nagbibigay-daan din ang pagpasok nila sa paaralan upang matukoy at matugunan ng mga guro ang anumang learning delays, problema sa kalusugan ng isip, at pang-aabuso sa bahay na negatibong makaaapekto sa kapakanan ng mga bata. Bagamat naitawid at naituloy pa rin ng ilang mga bata ang kanilang pag-aaral sa pamamagitan ng distance learning o online classes, hindi matatawaran ang mga positibong karanasang makukuha nila sa loob ng eskwelahan.
Sa unti-unting pagbubukas ng mga paaralan, mahalagang tutukan ng mga kinauukalan ang magagandang gawî at mga dapat iwasan at tugunan ng pamahalaan, lalo na ng DepEd. Sa ilang mga paaralan, tila hindi nakatulong ang paglalagay ng mga plastic barriers upang makita at marinig nang maayos ng mga bata ang itinuturo ng guro. Nilinaw na ng Department of Health (o DOH), sapat na ang pagsunod sa physical distancing, maayos na bentilasyon, paghuhugas ng mga kamay, at pagsusuot ng mask. Dahil din sa isang insidenteng umani ng batikos kung saan may mga armadong sundalo sa isang paaralan noong unang araw ng pilot face-to-face, mariing pinaalalahanan ng DepEd ang mga paaralan na maging zones of peace o lugar ng kapayapaan. Mahalagang ramdam ng mga batang mag-aaral at mga guro ang kaligtasan sa loob ng eskwelahan sa lahat ng oras at pagkakataon. Higit sa lahat, kasabay din ng pagbubukas ng mga eskwelahan ay ang pagtitiyak na lahat ng guro at iba pang non-teaching personnel ay nabakunahan na. Kung magagawa ang mga ito at maiiwasan ang hindi magandang gawî mas mapapanatag ang mga magulang at mga bata ngayong panahon ng pagbabalik nila sa paaralan.
Mga Kapanalig, sa anumang pagkakataon, hangad ng Simbahang Katolika ang pangkahalatang kapakanan at kaunlaran ng lahat ng tao, lalo na ng mga bata. Nangangahulugan itong dapat nakakamit nila ang mga serbisyong para sa kanilang kalusugan, maayos na tirahan, at, higit sa lahat, edukasyon. Sa pamamagitan ng edukasyon, nalalaman ng mga mga bata ang halaga ng kanilang dignidad. Nagbibigay-daan din ang edukasyon sa pagkakaroon nila ng sapat na akses sa lahat ng kanilang pangangailangan. Mangyayari lamang ito kung ang komunidad ay kumikilos at gumagawa ng mga makabuluhang hakbang katulad ng pagpapanatili ng kaligtasan sa mga paaralan. Pahalagahan natin ang mga bata gaya ng pagpapahalaga ni Hesus sa kanila. Gaya nga ng sinabi Niya sa Mateo 19:14, “hayaan ninyong lumapit sa akin ang mga bata… dahil ang mga katulad nila ay kabilang sa kaharian ng Diyos.”
