504 total views
Pormal na sinimulan ang pagdiriwang ng ika-50 anibersaryo ng National Secretariat for Social Action and Peace/Caritas Philippines o ang sangay ng Simbahang Katolika na namamahala sa mga programa para sa mga mahihirap at mga naapektuhan ng kalamidad.
Kasabay ng 50-taon anibersaryo ng NASSA ay ginaganap din ang ika-38 National Social Action General Assembly (NASAGA) kung saan nagtitipon-tipon ang mga Social Action Directors ng iba’t-ibang Diyosesis sa Pilipinas para pag-usapan ang mga patuloy na programa at pagkilos para sa mga mamamayang mahihirap, nasa malalayong lugar, naapektuhan ng kalamidad at nangangailangan ng suporta.
Ang pagdiriwang ay isinasagawa sa Archdiocese of Palo sa lalawigan ng Leyte kung saan tatlong taon na ang nakakalipas ay nakaranas ng matinding pinsala mula sa bagyong Yolanda.
Ayon kay NASSA/Caritas Philippines executive secretary Rev.Fr. Edu Gariguez, maituturing na biyaya ang selebrasyon ngayong taon dahil na rin sa halos limang dekada na pananatili ng Social Action sa Pilipinas dahilan kaya’t mas maraming delegado mula sa iba’t-ibang probinsya ang nagsidalo sa NASAGA na isinasagawa kada dalawang taon.
“Napakahalaga po ngayon ng ating general assembly dahil kasabay nito ay ipinagdiriwang din natin ang ika-50 taon ng NASSA kaya marami po ang kapiling natin ngayon aabot sa humigit kumulang 300 na mga kinatawan mula sa iba’t-ibang panig ng bansa,”pahayag ni Father Gariguez.
Naniniwala si Fr. Gariguez simboliko ang pagdiriwang sa Archdiocese of Palo dahil sa pinsala na iniwan dito ng Super Typhoon Yolanda na patuloy namang tinulungan ng Simbahan upang makabangon.
“Siyam na Diyosesis ang atin patuloy na tinulungan na naapektuhan ng bagyongg Yolanda at isa nga diyan ang Archdiocese of Palo kung saan napakarami ang naapektuhan sa totoo lang marami na din ang atin natulungan sa iba’t-ibang program intervention kagaya na lamang ng ecosystem, pabahay, livelihood program, dito lamang sa Palo nasa 11 parokya at mahigit 12 na libong pamilya ang atin natutugunan at patuloy na sinisikap na tulungan kasama ang gobyerno at iba pang NGO” pahayag ni Father Gariguez sa panayam ng Radio Veritas.
Batay sa datos ng Caritas Philippines aabot na sa 1.8 milyong survivors ng bagyong Yolanda ang kanilang natulungan sa siyam na probinsiya sa bansa.
