569 total views
Ito ang mensahe ni Manila Apostolic Administrator Bishop Broderick Pabillo sa pagdiriwang ng Pasko ng Pagsilang ni Hesus na bugtong na anak ng Diyos.
Paliwanag ng obispo, hindi na bago sa tao ang mga hamon ng buhay tulad ng kinaharap ng marami-ang negatibong epekto na dulot ng coronavirus pandemic.
Bukod pa rito ang patuloy na karahasan sa lipunan, tulad ng pagpaslang ng isang pulis sa mag-inang Sonya at Frank Anthony Gregorio sa Tarlac at ang patuloy na paghahanap ng lunas sa nakahahawang COVID-19 ay ilan sa mga suliraning kinakaharap ng kasalukuyang panahon.
Binigyang diin ni Bishop Pabillo na ang lahat ng ito ay malalampasan sa pagtitiwala sa habag at awa ng Panginoong Diyos na dala ni Hesukristong isinilang.
“But Christmas assures us: God is with us. God has become man in order to share our journey in this life,” bahagi ng Christmas message ni Bishop Pabillo.
Giit ng obispo nawa’y magsilbi itong inspirasyon ng bawat isa sa pagharap sa mga suliranin ng lipunan at magkaisang kumilos upang ito ay mapagtagumpayan.
Pinasalamatan din ng tagapangasiwa ng arkidiyosesis ang mga pari at mga layko na nagkakaisa sa paghahanda sa pagsilang ni Hesus sa matagumpay na siyam na araw ng simbang gabi at misa de gallo sa panahoon ng ‘new normal’ ng lipunan.
Kinilala ni Bishop Pabillo ang mga programa ng bawat parokya tulad ng online masses, online recollection at iba pa na makatutulong sa pagpapalago ng pananampalataya gamit ang internet.
“All these manifests the faith and devotion of our people and their great longing to welcome the Lord Jesus with the Blessed Virgin Mary. May God be praised! We thank our parish priests and our media people for their indefatigable work during these days,” ani Bishop Pabillo.
