13,721 total views
Naninindigan si House Speaker Martin Romualdez na ang kalayaan ng pamamahayag ay ang pundasyon ng demokrasya ng bansa.
Kinondena rin ng pinuno ng Mababang Kapulungan ang pinakahuling insidente ng pagpatay sa isang mamamahayag sa Misamis Occidental na si Juan Jumalon o mas kilala bilang DJ Johny Walker ng 94.7 Calamba Gold FM ay pinaslang ng hindi pa nakikilalang salarin habang nagpoprograma at aktwal na napanood ng marami dahil sa livestreaming.
Giit ng mambabatas, bawat mamamahayag ay may karapatan na ipahayag ang kanilang propesyon at adbokasiya ng may kalayaan, walang takot at panganib sa kanilang buhay.
Dagdag pa ni Romualdez, ang anumang karahasan laban sa miyembro ng media ay hindi katanggap-tanggap kaya’t marapat lamang na mapanagot ang may kagagawan ng pagpaslang.
“The freedom of the press is a cornerstone of our democracy. Every journalist deserves the right to exercise their profession without fearing for their safety or their lives. Any attack or violence against members of the media is unacceptable and deeply troubling. We must ensure that those responsible for these heinous acts are brought to justice,” ayon pa kay Romualdez.
Tiniyak din ng pinuno ng kamara ang suporta at pagtiyak ng kaligtasan ng mga mamamahayag sa paghatid ng mga pangyayari sa bansa.
Sa ulat ng Committee to Protect Journalist, simula 1986 hanggang 2022 umaabot na sa 158 mamamahayag ang nailat na napaslang sa Pilipinas.
Una na ring binigyang pagkilala ng Santo Papa Francisco na ang pamamahayag ay isang marangal na propesyon bilang daluyan ng katotohanan sa lipunan.
