563 total views
Hindi lamang bagyo at landscape ng mga lugar ang sanhi ng nararansang pagbaha sa iba’t ibang bahagi ng bansa tuwing tag-ulan.
Ito ang binigyang diin ni Diocese of Cubao Bishop Honesto Ongtioco kaugnay sa nararanasang malawakang pagbaha sa kalakhang Maynila at mga karatig lalawigan dulot ng Habagat na higit pang pinalalakas ng Bagyong Fabian.
Ayon sa Obispo, kabilang sa mga panguhing dahilan ng pagbaha lalo na sa kalakhang Maynila ay ang mga basura na bumabara sa mga kanal at imburnal.
Ipinaliwanag ni Bishop Ongtioco na bukod sa mga natural na kalamidad na regular na nanalasa sa bansa ay isa ring suliraning dapat masolusyunan ay ang pagtatapon ng basura ng mamamayan sa lansangan.
“In many places you can see that ‘yung makikita nating daan is sometimes up and down so may mga lugar na mababa at madaling bumaha pumunta ang tubig dun so ‘yan ang isa sa mga realities ‘yung landscape. Pero maraming mga dahilan kung bakit bumabaha, so hindi lang dahil mababa ang lugar kung minsan hindi mababa ang lugar pero baha, bakit? Basura na clogged ‘yung mga imburnal. ‘Yan ang isang medyo problema natin sa syudad – in places na develop – kung minsan ‘yung basura, people are not so concern kung saan nila tinatapon, they just throw anywhere so ito rin ang nagiging sanhi ng mga pagbaha.” pahayag ni Bishop Ongtioco sa panayam sa Radio Veritas.
Tiniyak naman ng Obispo na nakahanda ang Diyosesis ng Cubao na tumugon sa mga residente at mga parokya na maaring maapektuhan ng patuloy na pag-ulan sa pamamagitan ng pagbubukas ng iba pang mga Simbahan upang magsilbing pansamantalang tuluyan ng mga walang masisilungan.
“Wala pa akong narinig o nag-inform sa akin, normally ‘yung Roxas District medyo mababa dun and what we do just like Sto. Domingo which is another church, we open our churches for kung sakaling may mga flood wala silang masilungan, we open we did in the past.” Dagdag pa ni Bishop Ongtioco.
Tiniyak rin ni Bishop Ongtioco ang kahandaan ng diyosesis na magpaabot ng tulong partikular na ng mga pangunahing pangangailangan ng mga maapektuhan ng pagbaha.
Ayon sa Obispo, kabilang sa mga patuloy na inisyatibo ng diyosesis ay ang mga community pantry sa bawat parokya partikular na sa The Immaculate Conception Cathedral of Cubao.
“Patuloy pa rin ang ating pag-relief operation sa mga lugar na kung minsan nangangailangan hindi lamang dahil sa bagyong ito kundi dahil nasa pandemya pa tayo, ‘yung community pantry patuloy pa rin in some parishes. Mahigit kalahati doon nagsimula pero yung iba huminto muna dahil walang supply pero ‘yung iba patuloy pa rin like dito sa Cathedral Parish patuloy pa rin.” Ayon pa sa Obispo.
