198 total views
Ito ang katotohanan na ikinalulungkot ni Lingayen-Dagupan Archbishop Emeritus Oscar Cruz,dating Pangulo ng Catholic Bishops Conference of the Philippines sa masamang epekto ng kahirapan sa mga mamamayan.
Ayon sa Arsobispo, dahil sa matinding kahirapan ay napipilitang kumapit sa patalim ang mga mahihirap at tanggapin ang bayad o pera kapalit ng kanilang mga boto tuwing halalan.
Natitiyak ni Archbishop Cruz na hindi tunay na nadarama ng mga mahihirap na botante ang kanilang pambihirang kapangyarihan sa Demokratikong bansa na mamili at magluklok ng karapat-dapat na lingkod bayan sa pamahalaan.
“the poor are not free, poverty and democracy are not co-existent.. if you are poor,you are not free in a sense that you cannot vote for whom you like precisely because there is money for those who are willing to pay, you know the 3Gs Guns, Goons and Gold, hanggang ngayon naman magkakasama pa yan, come on let’s be real..” pahayag ni Archbishop Cruz sa Radio Veritas
Batay sa isinagawang survey ng Social Weather Station o SWS sa pagtatapos ng taong 2015, nananatiling 50-percent o katumbas ng 11.2-milyong pamilyang Pilipino ang nagsabing sila ay mahirap na kadalasang biktima ng vote buying at vote selling tuwing halalan.
Patuloy namang pinaiigting ng Simbahang Katolika ang Huwag Kang Magnakaw Campaign batay sa Ika-Pitong Utos ng Panginoon, kung saan maituturing na pagnanakaw sa dangal at kalayaan ng bayan ang pagbebenta ng boto at pagbili ng boto ng mga kapuspalad na Pilipino.