462 total views
Manila,Philippines — Nagpaabot ng pagbati si Archdiocese of Manila Apostolic Administrator Bishop Broderick Pabillo para sa ika-sampung anibersaryo ng Live Christ Share Christ Mission na isang Lay Catholic response sa panawagan ng Simbahan na pagpapalaganap ng ebanghelisasyon.
Ayon sa Obispo, napakahalaga ng ambag ng Live Christ Share Christ Mission sa pagbabahagi at pagpapalaganap ng ebanghelyo sa gitna ng panahon na nakararanas ang marami ng kawalan ng katiyakan dulot ng pandemya.
Nagpahayag naman ng suporta si Bishop Pabillo sa inihandang online New Evangelization Conference 2021 ng Live Christ Share Christ mission na hindi lamang nakatutok sa ika-sampung anibersaryo ng institusyon kundi sa patuloy na paggunita sa ika-500 anibersaryo ng Kristiyanismo sa Pilipinas.
“Ang Live Christ Share Christ mission is a Lay Catholic response to the call to evangelization at lalong lalo na ngayong panahon ng pandemic. Kailangan po nating palakasin ang ating evangelization kasi marami po ay naghahanap ng mga sagot sa maraming tanong na lumalabas ngayong panahon ng pandemic kaya ang Live Christ Share Christ mission ay nag-iimbita po sa lahat to take part in the New Evangelization Conference 2021 because of the 10th anniversary of the Live Christ Share Christ mission and because of the 500 years of Christianity.”paanyaya ni Bishop Pabillo
Inihayag ng Obispo na naaangkop ang layunin ng nakatakdang New Evangelization Conference 2021 lalo na sa gitna ng patuloy na paggunita sa ika-500 taon ng Kristiyanismo sa bansa ngayong panahon ng pandemya upang higit pang maipalaganap ang pananampalatayang Kristiyano.
Iginiit ni Bishop Pabillo na napapanahon ang pagtitipon upang magsilbing gabay sa panunumbalik ng pananampalataya sa mga Kristiyanong naligaw ng landas at nawalan ang pananampalataya sa Panginoon.
“Kaya ang layunin po ng New Evangelization Conference is to encourage Catholics to proclaim our gift of faith by reaching out to our brothers and sisters and to help especially those Catholics who have lapsed from the faith, yung mga nawala na po sa pananampalataya ibalik natin sila uli sa buhay ng pananampalataya, sa buhay ng Diyos.” Dagdag pa ni Bishop Pabillo.
Nakatakda ang online New Evangelization Conference 2021 ng Live Christ Share Christ mission sa ika-21 hanggang ika-23 ng Mayo na may temang “Gifted to Give by being a Light to the World”.
Tampok sa kumprehensiya ang iba’t-ibang inspirational talks, worhips sessions, prayer sessions, workshops, at pagbabahagi ng mga patotoo ng ilang mga piling taga-pagsalita.
