672 total reads
Hinamon ng arsobispo ng Maynila ang mamamayan na manindigan sa katotohanang hatid ni Hesus ang Kristong Hari.
Ito ang sentro ng pagninilay ng Kanyang Kabunyian Jose Cardinal Advincula sa pagdiriwang ng ikaanim na dekada ng kapistahan ng Christ the King Parish sa Project 7 Quezon City nitong November 21.
Ayon sa cardinal malaking hamon sa kasalukuyang panahon ang pagtukoy sa katotohanan lalo’t laganap sa lipunan ang fake news partikular sa social media.
Paliwanag ng arsobispo na ang pagbabahagi ng mga maling impormasyon ay maituturing na pagpanig sa kasinungalingan.
“Kapag naniwala tayo sa fake news at tayo pa mismo ang nagpalaganap ng mga ito, nagiging daan din tayo ng kasinungalingan. At kapag naging daan tayo ng kasinungalingan, hindi tayo nagiging panig kay Jesus; naging kasangkapan tayo ng kaaway, naging kasangkapan tayo ng demonyo,” bahagi ng pagninilay ni Cardinal Advincula.
Nababahala ang punong pastol ng Maynila sa labis na paglaganap ng fake news lalo na sa nangungunang social media sites tulad ng facebook, twitter at tiktok na karaniwang ginagamit ng mamamayan.
Aniya, maraming mga indibidwal ang naniniwala sa mga napapanuod sa social media at binalewala ang pamamaraan sa paghahanap ng katotohanan o fact checking sa bawat detalye.
Sa pag-aaral ng Statista Research nasa 80 milyon ang mga Filipinong aktibo sa social media kung saan sa forecast nito sa taong 2026 inaasahang aabot pa sa 90 milyon ang Filipino social media users.
Dahil dito, hinikayat ni Cardinal Advincula ang mananampalataya na hanapin ang katotohanan sa pamamagitan ng mga Salita ni Hesus.
“Bumalik tayo kay Jesus dahil ang mga Salita ni Jesus ay hinding-hindi magbabago; na kay Jesus ang katotohanan,” dagdag pa ng cardinal.
Ang Christ the King Parish sa Project 7 ay itinatag noong August 3, 1961 at kasalukuyang pinamumunuan ni Father Glenn Orocio.
Pinasalamatan ni Fr. Orocio ang mananampalataya ng parokya sa patuloy na suporta nito makalipas ang anim na dekada lalo na sa pakikiisa sa misyon ng simbahan na pagpapalago ng pananampalataya.
