267 total views
Titiyakin ng mga opisyal ng New Bilibid Prison ang seguridad ng mga high-profile prisoners na sugatan sa naganap na riot sa building 14 ng NBP.
Ipinangako ito ni PNP spokesperson Superintendent Dionardo Carlos matapos ang riot na kinasasangkutan ng mga tinaguriang high-risk criminal.
Paliwanag ni Carlos, sa mga opisyal pa rin ng NBP magmumula ang mga desisyon at gampanin ng PNP-SAF na pansamantalang itinalaga sa bilaguan upang magpatupad ng mas mahigpit na seguridad sa loob ng pambansang piitin.
“well NBP Officials will take the necessary decision on that, our personnel is there for the disposal of the leadership of the NBP, so they will secured based on the instructions and orders of the NBP officials…”pahayag ni Carlos sa Radio Veritas.
Kaugnay nito, ipinaubaya na ng Bureau of Corrections ang imbestigasyon sa PNP- Crime Investigation and Detection Group (CIDG) upang malaman ang pangunahing dahilan sa naganap na riot sa loob ng building 14 ng NBP na ikinasawi ng high-profile prisoner na si Tony Co at ikinasugat naman nina Jaybee Sebastian at Peter Co na kapwa inaasahang titestigo sa isinasagawang pagdinig sa Kongreso kaugnay sa patuloy na illegal drug trade sa loob ng NBP.
Samantala, una nang inihayag ng PNP na bumaba ng 31-porsyento ang krimen sa bansa mula noong nakalipas na taon habang nabawasan naman ng 90-porsyento ang supply ng ilegal na droga sa bansa.
Magugunitang, una nang nagpahayag ng pagsuporta ang Simbahang Katolika sa layunin ng mas pinaigting na kampanya ng pamahalaan laban sa ilegal na droga, ngunit binigyang diing hindi nararapat malabag ang ano mang karapatan ng mga mamamayan higit sa lahat at kitilin ang buhay maging ng mga hinihinalang sangkot sa kalakalan ng ipinagbabawal na gamot.
