379 total views
Muling hinimok ng opisyal ng Catholic Bishops’ Conference of the Philippines ang pamahalaan at mamamayang Pilipino na pangalagaan ang Verde Island Passage (VIP) laban sa panganib ng fossil fuel industry.
Ito’y kasunod ng binabalak na pagpapalawig sa liquified natural gas (LNG) terminal mula sa lalawigan ng Batangas patungo sa V-I-P.
Ayon kay San Carlos Bishop Gerardo Alminaza, vice chairman ng CBCP – Social Action Ministry na hindi dapat pahintulutan ang proyekto dahil magdudulot lamang ito ng pinsala sa kalikasan at hanapbuhay ng maraming maliliit na mangingisda.
Pinangangambahan ng Obispo na mangyari ang oil spill na lubhang makakaapekto sa mga yamang-dagat na matatagpuan sa VIP.
“Pinaka-centerpiece ng mundo ang VIP sa mga unique na mga coral species at marine life. Kapag magkaroon ng traffic doon ng mga ships na mag-deliver ng LNG, talagang hindi maiiwasan ‘yung mga oil spill. It will affect the environment at ang unang maapektuhan noon ay ang mga fisherfolks,” pahayag ni Bishop Alminaza sa panayam ng Radio Veritas.
Panawagan naman ni Bishop Alminaza sa mga kapwa Obispo na magtulung-tulong upang mapigilan ang pagtatayo ng LNG plant sa bansa at maitaguyod ang patuloy na pangangalaga sa kalikasan lalo na sa mga pinakakaingatang yamang-dagat.
Ang VIP ang tinaguriang “most biodiverse marine habitat” sa buong mundo dahil dito nagmumula ang nasa halos 60-porsyento ng shore fish species sa mundo.
Mayroon itong sukat na 1.14-milyong ektaryang nakapaloob sa Mindoro-Calavite-Tablas triangle na saklaw ng mga lalawigan ng Batangas, Marinduque, Occidental at Oriental Mindoro, at Romblon.