115 total views
Tiniyak ng Land Transportation Franchising and Regulatory Board o LTFRB na tuloy na ang implementasyon ng 10-pisong rollback sa flag down rate sa taxi at maging sa mga airport taxi sa buong bansa.
Ayon kay LTFRB Public Assistance and Complaints Desk Head Arnel del Rio, epektibo na ang bagong singil sa mga taxi sa ika–19 ng Marso.
Gayunman, nilinaw ni del Rio na hindi kabilang sa bagong flag down rate ang Cordillera Administrative Region.
“Ang flag down rate na ibinaba natin mula 40-pesos sa bagong flag down rate na 30-pesos ay permanent na po ito, yun po kasing ginawa natin dati ito po ay probitional lamang at tiningnan po ng LTFRB ang galaw ng Fuel price ng mundo partikular na po dito sa Pilipinas kung paano poi to nakakaapekto sa ating pang-araw-araw na gastusin at nakita po natin na talagang kailangan ng i-adjust ng permanente ang presyo o ang pamasahe po unahin muna natin yung sa taxi..”pahayag ni del Rio sa panayam sa Radio Veritas.
Kaugnay nito, hinimok naman ng LTFRB ang publiko na isumbong sa kanilang tanggapan ang mga taxi driver na hindi susunod sa tamang singil.
“Ang violation po sa hindi susunod ay overcharging, meron po itong multa na P5,000 sa unang pagkakataon at ang kailangan lang po gawin ng ating mga pasahero ay itawag sa aming 24/7 Hotline Number 1342, meron pong sasagot dyan 24/7 po..” dagdag pa ni Del Rio.
Sa tala ng LTFRB, umaabot sa mahigit 800 ang mga reklamo noong 2015 dahil sa mga taxi drivers na sobra ang isinisingil sa pamasahe.
Kaugnay nito, nanawagan ang CBCP Episcopal Commission on the Laity sa mga taxi operators sa bansa, na babaan rin ang boundary bilang pagsasaalang – alang sa kita ng kanilang mga empleyadong driver, na apektado rin sa pagbaba ng pasahe bunsod na rin ng pagbaba ng presyo ng produktong petrolyo sa merkado.
Sa panlipunang katuruan ng Simbahan, kinakailangang may batayang moral ang anomang uri ng paggalaw sa presyo ng bilihin at hindi dapat ito makakaapekto sa kapakanan ng ordinaryong mamamayan.
