750 total views
Nangangamba ang arsobispo ng Archdiocese of Cebu na makasanayan ng tao ang pagiging komportable at maisasantabi ang kaugaliang magsakripisyo para sa kabutihan ng nakararami.
Ito ang pagninilay ni Archbishop Jose Palma sa nalalapit na pagdiriwang ng isang dekadang pagiging santo ni San Pedro Calungsod.
Ipinaliwanag ng arsobispo na hindi dapat nalilimutan ng mananampalataya ang pagsasakripisyo ng mga santo ng simbahang katolika upang itaguyod ang pananampalataya.
“I’m afraid the world has become a world where we seek the culture of comfort. If it’s no longer comfortable, if it’s no longer easy, if it’s no longer enjoyable… parang it’s no longer an obligation. As if we do not have the duty to do it,” pagninilay ni Archbishop Palma.
Binigyang diin ng punong pastol ng Cebu na ang mga martir ng simbahan tulad ni San Pedro Calungsod ay nagsakripisyo para sa simbahan at buong pusong inialay sa Panginoon ang kanilang buhay.
Apela ni Archbishop Palma sa mamamayan na huwag masanay sa pagiging maginhawa sa halip ay harapin ang iba’t ibang hamon ng buhay nang may kababaang loob tulad ng halimbawa ng mga martir ng simbahan.
“We may not be a martyr, but please not conform to the culture of comfort,” ani ng arsobispo.
Iginiit ng opisyal na mahalagang maturuan ang mga kabataan at pagtibayin ang pundasyon ng pagiging kristiyano lalo’t ito ang inaasahang magpapalago ng pananampalataya sa mga susunod na henerasyon.
Gugunitain ang canonization ni San Pedro Calungsod sa October 21 ang santong tinaguring pintakasi ng mga katekista.
Si San Pedro Calungsod din ang ikalawang Pilipinong napabilang sa mahigit sampung libong mga banal ng simbahang katolika.
